Par cuasi dîs agns Hattrick al à vût il stès stîl. Il stîl corint al è dal 2000. cuant che dût il zûc al è stât scrît di gnûf par fâ spazi a plui dai 1700 utents che o vevin in Svezie in chê volte. Dût il progjet di riscriture al è stât fat di dôs personis tal lôr timp libar, e il stîl al è stât butât ju intun dopomisdì a la fin de Istât dal 2000. Vie pai agns il zûc al è une vore cressût, a son stadis zontadis gnovis opzions, gnovis leghis e tancj gnûf utents. Cuasi dût al è stât scrît di gnûf une o fintremai dôs voltis, gjavant il stîl. A part un pâr di "lifting", al è simpri il stès stîl.
Come dite chi disore, nol è dome pe etât. Dite chest, al è impussibil neâ che l'etÂt al un fator impuartant. Come utents di internet, o vin un compuartament e une domande totalmentri diferente di chê che o vevin tal 2000. A son sucedudis un grum di robis ancje tal aspiet tecnic. Cualchidun dai problemis che o vin cjatât cul nestri stîl a son leâts diretementri cun l'etât e cun la evoluzion dal web, altris no. Dût câs, o pensin che al sedi impuartant spiegâ parcè che al sarà un gnûf design. Cussì tu puedis capî lis resons, cussì come i beneficis, cuant che il mont di Hattrick al cambie aspiet.
Il nestri sît vuê al è fat in frames. Cheste tecniche e jere avonde comune tal 2000 e e je rare al dî di vuê. Il grant probleme dai frames al è che al è une vore dificil meti tai segnelibris o fâ un leâm a une cierte pagjine. Se tu vierzis la pagjine intune gnove tabele (o intune gnove barconete dal sgarfadôr), ducj i menu e la tabele in alt a sparissin. Par di plui, i frames a rindin la vite dificile ai motôrs di ricercjie par cjatâ informazions.
Tabaiant dai problemis di navigazion, cussì come il zûc al è cressût, a son aumentadis lis alternativis e lis opzions par ogni pagjine. Come risultât o vin un menu te çampe cun masse alternativis. Tu âs di vê une cierte esperience par sgarfâ in libertât. Pai gnûfs utents, al pues sedi dificil cjatâ lis robis e imparâ il sisteme dai menu (simpri che tu rivedis) al puarte vie un grum di timp. par esempli, a son un grum di mûts par rivâ te pagjine dai trasferiments, ma nissun di chescj al è dirèt o logjic. Un grum di pagjinis a son balinadis cun diferentis informazions e opzions (ma ancje cussì, un grum a mancjin di tests di aiût!), la pagjine dai detais dai zuiadôrs al è un bon esempli. Il jemplament al è in part causât des zontis al zûc, insiemi al fat che tal stès timp no vin cjavât tantis informazions.
Un altri difiet al è che il font al è masse piçul. Al vares di jessi plui grant par jessi lêt cun facilitât. Ma fâlu plui grant cul design di vuê al fasares deventâ masse larc il menu e altris robis tai flancs a cjaparessin masse spazi. Al moment, il sît al è pensât pai schermis piçui, parcè che e jerin cussì tal 2000. Viodût che di che volte i schermis a son deventâts simpri plui grancj, vuê nol à sens vê un sît disegnât par schermis piçui. Specie cuant che dome une piçule part di utents a dopre schermis cun basse risoluzion, e chescj no varan problemis a continuâ a doprâle cul nestri gnûf design.
Par finî o vin di dîsi che o sin cressûts cun chest design e al è stât un grant compagn par tancj agns, o vin di ameti che al à une man dai '90. No che al sedi alc di mâl tai '90, ma o varesin voie di vê alc di plui moderni e fresc. Al sares ancje biel vê un set di iconis tal stès stîl e de stesse font (lis iconis di vuê a son in stîi diferents e di diviersis fonts), e o varessin voie che al deventedi plui facil creâ skin diferentis par Hattrick, robe che vuê e je dificile.
Cuant che o lavorin intun gnûf design si concentrin specialmentri in chestis robis. Un grant benefici tal preparâ dût dal nuie al è che o pensarin ogni singule pagjine par volte. O podarin fâ une struture miôr e o podin ancje preparâ gnovis pagjinis pe prossimis opzions. Un altri benefici al è che par nôaltris al sarà une vore plui facil (e svelt!) lavorâ cul gnûf design ripiet che cul vecjo, nûs fasarà risparmiâ un grum di timp cuant che al sarà pront.
Il nestri gnûf costum al à di vê un aspiet moderni e al à di jessi adat a personis che doprin internet normalmentri. Al à di vê une buine struture cuntune navigazion logjiche. Al è ancje impuartant mantignî il feeling di Hattrick, dungje no stâ spietâti nuie di masse vivarôs. Dît chest, o savin che cambiâ un design che tancj di vualtris a son usâts a doprâ al pues sedi dificil tal inizi. Ma ancje se no tu ti inamoraràs a colp dal gnûf aspiet, o sin sigûrs che nol ocararà tant prime che tu lu fasedis. Ûs mostrarin cualchi esempli dal gnûf stîl e o scoltarin ce che nûs disarês vie pe strade viers il dî dal ritîr, par rindi il cambiament mancul brusc. E se tu varàs voie di viodi di gnûf il vecjo design dopo il ritîr, tu puedis simpri visitâ il
museu dulà che lu metarin insiemi al design origjinâl dal 97.