Novitâts

Prime di dut metìn in clâr che ancje se chest inzornament al rindarà la gjestion des zovanîls plui plasevule e une vore miôr, nol vûl disi che al sarà un compit facil e cence misteris. Gjestî lis zovanîls al sarà simpri une sfide, ma e sarà une sfide plui divertente e entusiasmant. Cumò, tabaìn dai cambiaments!

Cambiaments tai events di alenament e scuvierte des abilitâts
La gnove plui grande in chest inzornament e je che lis abilitâts dai zovins e puedin sedi scuviertis. Lis scuviertis a son basadis su ce che al dîs tal rapuart l'alenadôr. Prime che l'alenadôr al scomenci a lei il rapuart, al disarà che al varà notiziis impuartantis par cualchi zuiadôr, par i gjestôrs che e àn gust a scuvierzi lis abilitâts par lôr cont.

Come za dit, la scuvierte des abilitâts e je basade su ce che l'alenadôr (e l'osservadôr) al dîs tal so rapuart. O vin ancje miorât il rapuart, e insiemit cun la scuvierte des abilitâts, ti darà un struc de situazion plui precîs, no si ripetarà e al disarà robis plui sensadis. Chescj a son i detais dai cambiaments:

- Cuant che l'osservadôr al disarà che un zuiadôr al è a un ciert nivel (o che al pues rivâ a un ciert nivel), la abilitât e sarà palesade e visibile te pagjine dal zuiadôr. Di cumò indenant tu puedis fidâti al 100% di ce che al dîs l'osservadôr (prime al podeve sbaliâ di un pôc).

- Come che al sucêt vuê, l'alenadôr al menzonarà la abilitât di un zuiadôr par ogni tip di alenament che tu âs sielt. La novitât a è che il nivel atuâl di chestis abilitâts (pai zuiadôrs menzonâts) al sarà rivelât e visibil te pagjine dal zuiadôr. L'alenadôr ti darà simpri un rapuart suntun zuiadôr che nol à ancjemò nissune abilitât rivelade, al somee che al sedi vuarît dal Alzheimer.

- Cuant che l'alenadôr al dîs che a un zuiadôr i reste un ciert timp par rivâ al so potenziâl intune abilitât, sei il potenziâl che la abilitât e saran mostradis te pagjine dal zuiadôr.

- L'alenadôr al segnalarà l'aument dome des abilitâts che a son za stadis scuviertis. Se une abilitât no je ancjemò stade scuvierte, nol menzonarà eventuâi auments di nivel. Di chê altre bande, al fasarà rapuart di ducj i auments des abilitâts bielzà scuviertis e naturalmentri, tu podarâs viodi la situazion inzornade te pagjine dal zuiadôr.

- Cuant che l'alenadôr al disarà che un zuiadôr nol pues plui cressi intune cierte abilitât (al à razunt il so potenziâl in chê abilitât), sei il potenziâl che il nivel de abilitât e saran mostrâts. Cundiplui, la bare de abilitât e deventarà zale, segnalant che al zuiadôr nol zovarà plui alenâsi in che abilitât. Dal moment che l'alenadôr al è vuarît dal Alzheimer, no si ripetarà plui.

- Se sei la abilitât che il potenziâl a son za stât scuvierts prime che il zuiadôr al rivedi al massim in chê abilitât, la bare e deventarà zale apene che il potenziâl al ven tocjât (ancje se l'alenadôr no lu dîs tal rapuart).

- L'alenadôr nol visarà plui cuant che un zuiadôr al finìs i agns, duncje no vignaran plui fatis fiestis di complean.

In chest inzornament e son ancje corezions di erôrs; i rapuarts su la agressivitât cumò e funzionin coretementri, cussì come l'erôr di visualizazion che al saltave fûr cuant che un zuiadôr al finive i agns.

Sui rapuarts passâts
Il sisteme descrit chi parsore al à zirât par pôc plui di dôs setemanis ormai, cussì come sorprese, ducj o veis cualchi zuiadôr/abilitât di rivelâ. I rapuarts dal osservadôr/alenadôr plui vecjos però no son stâts interessâts di chest cambiament, duncje nol sarà nuie di rivelâ in chest câs.

Cambiaments tai events dal alenament, fase doi
O vin voie di visâ che e sarà ancje une seconde fase par i cambiaments dai events dal alenament. La prossime fase no varà cambiaments impuartants come chest inzornament, ma a includarà dai cambiaments tes informazions che ti da l'alenadôr. La reson par ce che o vin decidût di spietâ un pôc pe seconde fase, e je che o vin voie di verificâ cemût che al funzionarà chest inzornament, prime di decidi i detais de fase doi. Chest secont inzornament al vignarà fat su par ju jenfri un mês.

Grups pes amichevulis des zovanîls
Fin cumò, cjatâ une scuadre di sfidâ par une amichevule nol jere cuissà ce facil, ma cul grup pes amichevulis al deventarà une vore facil. Il grup pes zovanîls al è une vore simil a chel pe prime scuadre, tu zontis la scuadre al grup de pagjine des sfidis e po dopo e vignarà automatichementri organizade une amichevule. I Supporters a puedin specificâ campionâts o regjons e ancje sgarfâ il grup par scuadris disponibilis, propit come che al sucêt pe prime scuadre.

Ce che al è diferent tal grup des zovanîls, al è che ti vignarà assegnât un interval di timp jenfri il cuâl si podarà zuiâ la partide. Il grup al sielzarà in automatic la zornade cuant che lis dôs scuadris e podaran sfidâsi (e che ducj i doi o vedis avonde timp par razunzi la localitât de partide e che no vedis partidis di campionât di zuiâ te stesse zornade). In ogni câs, se tu sês un Supporter, tu puedis sgarfâ tal grup par cirî scuadris disponibilis e sielzi cuant zuiâ la partide. Il grup al sielzarà la ore esate, dal moment che o vin viodût che a son pocjissimis personis che a sielzin oraris diferents di .00 e .30.

Cambie non ae scuadre e al stadi
Il non de tô scuadre e dal stadi no àn di sedi incidûts tal cret, di cumò tu puedis cambiâ nons se tu vuelis. Il non de scuadre al pues sedi cambiât dome jenfri lis stagjons, ma il non dal stadi al pues sedi cambiât in cualsisedi moment. Tu puedis cambiâ non dal stadi de pagjine dal stadi (Scuadre Zovanîl → Stadi). Lis tassis par cambiâ non a saran la metât dal normâl, e i tifôs no fasaran câs al cambiament.

Storie dai osservaments
Un grum di etichetis discografichis e àn fat l'erôr di no crodi ai Beatles tai prins agns 60, une robe de cuâl si son une vore pintîts agns dopo. Cumò tu puedis viodi cualis scuadris e àn refudât il to zuiadôr prime che tu tu i fasessis une ufierte. La storie dai osservaments tu puedis cjatâle tai moments memorabii dai zuiadôrs.

I fantastics fruts dal vicinât
Se il to aversari nol rive ae partide cuntune formazion valide, tu cjatarâs cualchi frut dal vicinât pront par zuiâ cuintri i tiei une partide improvisade. Chest al vûl dîsi che i tiei zuiadôrs a rivaran a zuiâ (simpri che tu tu vedis une formazion valide) e no tu vignarâs “punît” de assence dal to aversari.

Miorament ae gjenerazion dai zuiadôrs
In chest inzornament o vin miorât ancje la gjenerazion dai zuiadôrs, sei pes zovanîls sei cuant che tu reclutis un pe prime scuadre. Chestis modifichis a son stadis fatis par rindi compagns i zuiadôrs gjenerâts dai doi sistemis, ma ancje par miorâ lis carateristichis dai gnûfs portîrs.

Di cumò indenant, par i zuiadôrs des zovanîls il massim par i tîrs plaçâts al sarà ecelent. Chest al sarà valit ancje pai portîrs, che in medie a varan une abilitât tîrs plaçâts plui alte di cumò, une difese plui alte e une abilitât paradis lizermentri plui basse.

La abilitât tîrs plaçâts e sarà ecelent ancje pal vecjo sisteme de zovanîls. Lis abilitât tîrs plaçâts e difese e saran similis a chês des gnovis zovanîls (ma no saran cambiaments pe abilitât paradis). Cundiplui, di cumò indenant, la etât dai portîrs e sarà jenfri 17 e 19 agns.

Par cumò, chest al è dut. Come za dite e sarà ancje une seconde fase (plui piçule) che a rivuarde lis informazions sul alenament. O sintin ancje il bisugn di miorâ la gjestion dal campionât zovanîl, ma par sfortune, chest aspiet al è avonde complicât di cambiâ, duncje al sarà di spietâ ancjemò un pôc prime di viodi novitâts.
Cumò, va a dâ un cuc ai tiei zovins, a dovaressin sedi un pocjis di abilitâts che a spietin dome di sedi riveladis. Un moment unic e plasevul.