Novitâts
11-23-2009
Editoriâl: I Bot insom
La HFA (Hattrick Football Association) e à decidût di mandâ lis scuadris Bot te division plui basse pussibil ae fin de stagjon, e di impedî che i bot a vegnin promovûts. Par cuintri, cualchidun di voaltris al vegnarà promovût gratis par jemplâ i puescj lassâts libars dai bot.
O vin fat chest cambiament par spostâ i bot tes seriis plui bassis e permetius di zuiâ un cuintri chel altri. In cheste maniere, o zuiarês cuintri plui scuadris gjestidis di oms impen di zuiâ cuintri noiôs bot, rindint la esperience di zûc plui divertente.
Chest gnûf (e permanent) sisteme al jentrarà in vigôr ae fin di cheste stagjon e al sarà valit pes divisions de VI in ju. I bot tes divisions de V in su e continuaran a sedi gjestîts cul vieri sisteme. Lei chi sot par vê plui detais.
Rindinsi cont; Al è tanton plui divertent zuiâ cuintri personis veris pluitost che cuintri un bot. Lis scuadris bot e zuin un rûl impuartant tal zûc come scuadris di passaç, o par jemplâ seriis dulà che no son vonde scuadris veris. Però no saran mai bogns di impersonâ la sfide cul cjâf di une altre persone.
Cussì, ae fin di cheste stagjon o introdusarìn lis gnovis regulis permanentis su cemût che i bot a vegnin promovûts o retroces, regulis che e laran a cambiâ ancje la maniere che e vignaran promovudis lis scuadris veris. O vin voie di fâ il pussibil par fâ in maniere che lis scuadris veris e zuiedin cun scuadris veris e i bot cuintri i bot. Al funzionarà cussì:
Ducj i bot de division 6 in ju a vegnaran retroces te division plui basse pussibil. Che rivedin prins, tierçs o cuints, a vegnaran simpri retroces. Però e je une ecezion: te VI division, i bot che a rivaran prins a vegnaran promovûts e chei che a rivaran seconts a zuiaran un sparegjo. Cussì un bot che al rive secont in VII, par esempli, al pues sedi retroces fin a la X division (se cheste no je bielzà plene di bot).
Chest naturalmentri al vûl disi che i bot no vegnaran promovûts (fûr che la promozion de VI a la V, come scrit parsore). Il risultâ al è che i bot a laran a finîle di sclop te ultime division - e a restaran lì.
Lis scuadris veris e cjapin il puest dai bot
Cuant che i bot a vegnin retroces, lis scuadris veris e cjapin il lôr puest. Cussì, ancje se no tu ti cualifichis pe promozion, tu âs ancjemò sperancis di sedi promovût. Si podarès disi promovût "a gratis". Però tu puedis sedi promovût dome di une division par stagjon.
Chestis promozions straordenariis e saran basadis sul plaçament di leghe, propit come lis promozions normâls. La scuadre cl miôr plaçament te division 7 (che no sedi bielzà cualificade pe promozion) e sarà la prime a cjapâ il puest di un bot retroces de division 6, e vie indevant. Pe cope al vâl il stes discors, lis scuadris che e otegnin la promozion straordenarie e cjapin il puest dal bot in cope (se il bot si è cualificât pe cope).
Nuie bêçs pe promozion
Se tu vegnis promovût "a gratis" no tu cjapis bêçs pe promozion de HFA. I tifôs però a fasaran fieste instès, come che e fos une promozion normâl, e il club dai tifôs al varà un aument di membris dal 10%. Cundiplui i tifôs no si spietaran masse de scuadre te gnove division.
Lis scuadris e saran simpri retrocedudis
Ten di ments che lis scuadris veris che si cualifichin pe retrocession e saran simpri retrocedudis. Se tu rivis ultin tu vegnis retroces ancje se a son bot te tô serie. E son lis scuadris des divisions plui bassis che e vegnin promovudis e che e cjapin il puest dai bot. La uniche ecezion e je cuant che no son scuadris veris che e àn di sedi promovudis, in chest câs tu restis te tô division ancje se tu rivis ultin.
Lis gnovis regulis e son validis de division 6 in ju
Chestis gnovis regulis e son validis de division VI in ju. De division V in su, si continuarà a doprâ lis stessi regulis che e son cumò. In ogni câs, no 'ndi è tancj bot tes divisions de VI in su (plui dal 99% dai bot al zuie in divisions de VI in ju).
Il mutîf par mantignî lis regulis come che e son te divisions plui altis, al è che a son i sparegjos, e creâ un sisteme che al rivedi a gjestî dutis lis ecezions al sarès masse complicât (almancul par cumò).
Lis divisions plenis di bot e vegnaran sieradis
Se dute la ultime division di une nazion e je fate di bot, la HFA la sierarà e la gjavarà dal sisteme de serie. Chest par fâ in maniere che lis gnovis scuadris no si cjatedin intune division fate dome di bot. Se plui tart nol sarà puest pes gnovis scuadris, une gnove division e sarà facilmentri zontade al sisteme.
Esempli da situazion a divignî
Al prin zîr, un grun di scuadris e vegnaran promovudis "a gratis" dal moment che al è un grun di bot che a àn di sedi retroces. A la fin de prossime stagjon, lis scuadris promovudis "a gratis" e saran un grum di mancul, ma butin ju cuatri numars par fâ capî cemût che il gnûf sisteme al modificarà il zûc:
In Spagne a 'ndi son 28157 scuadris di bot. In di dì vuê 6336 a zuin te division XI, 11086 in X, 5521 in IX, 2942 in VIII, 1517 in VII e 651 in VI. La prossime stagjon a saran 24 bots in div VI e 28029 in XI, e nissun bot te divisions VII, VIII, IX o X.
(Ten di ments che chescj a son dât preliminârs, e podaressin sedi piçulis diferencis tai valôrs finâi – però chest al jude a rindisi cont de situazion)
No vûl sedi promovût "a gratis"
Se par cualchi mutîf no tu vuelis sedi promovût "a gratis", la HFA ti da la pussibilitât di disi di no tes tôs preferencis. Di miercus, cheste impostazion e sarà presint te tô pagjine des preferencis (il valôr predefinît al sarà di acetâ la promozion). Cheste impostazion, naturalmentri e vegnarà aplicade dome a lis promozions "straordenariis" e no a chês normâls.
Ma visiti che la HFA no acetarà no come rispueste se tu zuis te division plui basse e cheste e podarès sedi jemplade di bot (e di conseguence sierade). Se chest al ves di sucedi, tu vegnarâs promovût instès, dal moment che in câs contrari tancj zuiadôrs a podaressin scomençâ la lôr cariere intune maniere masse noiose.