Novitâts
2-24-2010
Editoriâl: Prossime stagjon: belançament de formazion miorât
Ti informin che o vin un grues inzornament dal motôr di zûc pe prossime stagjon, propit come che o vin fat la ultime volte. L'ultin inzornament però nol modificave la tô "vite" di gjestôr, chest invezit sigurementri.
Il fin di chest inzornament al è chel di belançâ miôr il motôr di zûc cun lis diviersis formazions, e lis parts de scuadre. O vin ancje voie di rindi plui facil e plui diret il to rapuart cul motôr di zûc, in particolâr par ce che al rivuarde i ordins pe partide.
In pratiche, cheste modifiche e rindarà pussibil doprâ un numar plui grant di formazions rispiet a prime, e e ridusarà il podê dai centricjampiscj centrâi. Cundiplui e son proviodudis modifichis ae esperience te tatiche (routine), ae confusion e ai contribûts dai diviers zuiadôrs.
Par cui che nol capìs nuie di balon, lis tatichis e podaressin someâ un esercizi noiôs. par me (e par tancj di voaltris o imagjini) e je une cierte magjie in chei trê numars. A disin come che la scuadre a sviluparà il sô zûc, cualis intenzions che e à e ancje cualis misuris che e à cjapât par blocâ la fuarce dal aversari.
La bielece e je ancje il fat che no à di esisti une formazion imbatibile. Une tatiche e pues sedi la ricete juste cuintri cierts aversariis, ma une brute idee cuintri altris. Ce che al impuarte verementri al è ce che tu fasis cun chescj numars, ce che al è daûr di lôr. Chest al è chel che o vin voie di fâti vivi tant che tu zuis a Hattrick.
Realizâ la nestre vision di Hattrick
Come che o vin bielzà dit tal editoriâl sun la nestre idee di Hattrick, l'istât passade, o vin voie di belançâ e semplificâ il motôr di zûc. In plui che zontâ ce che o vin dit parsore, cheste modifiche e metarà plui in prin plan la tô scuadre, e zontarà competizion, e vierzarà gnovis stradis viers il sucès e à rindarà lis sieltis plui facilis di capî e meti in pratiche (e ae fin chescj a son ancje i nestris principis).
Ven a stâi che la prossime stagjon tu varâs: un motôr di zûc belançât e al stes timp plui facil. Ducj i detais su cheste modifiche a saran spiegâts ae fin dal editoriâl, ma e son ciertis robis che o vin voie di dîti prime:
Rivuart ai contribûts
In dì di vuê il 3-5-2 e je la formazion dominante, principalmentri parcè che tu puedis puartâ al massim lis valutazions dal centricjamp, otignî un bon atac e une difese decente tal stes timp. Ma ancje se tu sielzis une altre formazion, zuiâ cun 3 centricjampiscj centrâi e je la soluzion miôr par sedi competitîf.
O vin voie di diversificâ
Diversificâ di plui l'ûs des formazions. Creâ spazi par une maiôr diviersitât al aumentarà lis opzions tatichis e strategjichis, che a lôr volte e zontaran tant al zûc. Par otignî chest e par motivâ i gjestôrs a doprâ altris formazions o vin bisugne di sbassâ la fuarce dai centricjampiscj centrâi, soredut cuant che a vegnin inschiriâts trê. E chest al è ce che al sucedarà cun cheste modifiche.
Di fat, dopo cheste modifiche, inschiria un sôl centricjampist centrâl nol varà diferencis rispiet a prime. Inschiriâ dôi al fasarà pierdi un pôc dal valôr e inschiriâ trê al compuartarà une pierdite plui alte. Chest principi al è valit ancje par chei altris zuiadôrs in posizions centrâls (difensôrs e atacants), ma chescj a varan plui beneficis rispiet a prime se a saran inschiriâts bessôi, e il stes benefici se a saran inschiriâts in cubie. Inschiriant trê invezit al fasarà pierdi un pôc dal benefici rispiet a vuê, ma simpri mancul di ce che a pierdin i centricjampiscj centrâi.
E son includudis ancje ciertis modifichis sul pûr contribût di un zuiadôr. Jenfri chestis e son degnis di note:
- Alis, tiercins e atacants a dopraran di plui la lôr abilitât in cross
- I atacants difensîfs tecnics a dopraran mancul i passaçs al centri e di plui chei su lis alis.
Rivuart aes formazions
E son includudis tal inzornament modifichis ae esperience te tatiche e ae confusion. In pratiche al sarà plui facil mantignî la esperience intune tatiche, e cheste e varà un rôl maiôr in relazion ae confusion. Cundiplui:
- Tu puedis otignî routine par dutis lis formazions pussibilis (e saran zontadis: 2-5-3, 5-2-3 e 5-5-0)
- Formazions estremis (plui di 3 difensôrs/centricjampiscj/atacants centrâi, come tal 7-3-0 o 4-6-0) no si podaran doprâ
- Il 4-4-2 al sarà tratât come cualsisei formazion
Prime i canais
Cheste modifiche e sarà sperimentade tes scuadris zovanîls plui indevant cheste stagjon. Chest nus permetarà di vê cualchi setemane di prove par sedi sigûrs che il motôr al funzioni come che al varès, e tal stes timp la pussibilitât ancje par te di provâ il gnûf sisteme.
Pes scuadris maiôrs, o sperin di podê partî cun la ultime amichevule di cheste stagjon (un test plui lunc pes primis scuadris al è impussibil: no podin doprâ il vieri e il gnûf motôr in contemporanie). Chest al vûl disi che o varin di riorganizâ lis semifinâls e la finâl di Cope dal Mont.
Par cumò al è dut. Us darìn plui informazions cuant che o fasarìn partî la modifiche pes scuadris zovanîls.