Novitâts
6-14-2010
Editoriâl: Hattrick si re-invie
Cheste istât e puartarà grancj cambiaments ae scuadre di Hattrick e ae maniere che o svilupìn Hattrick. Daspò dîs agns o lassìn i nestris ufizis a Stocolme e si spostin a Malmö tal Sud de Svezie.
La reson principâl par chest spostament e je che a Malmö o varìn la pussibilitât di costruî une scuadre dulà che ducj e lavorin tal stes puest, rindint plui facile la planificazion dai progjets, la discussion sui mioraments dal zûc e il cjapâ decisions cuant che al covente.
Chest nol è stât pussibil fin cumò a Stocolme, parcè che personis come il nestri architet di sisteme HT-Daniel, il nestri gjestôr dal svilup HT-Chris, e me stes, no vivin chi. O sin rivâts a suplî a chest probleme par tancj agns. Tai ultins agns, lis robis e àn funzionât avonde ben, ma dal moment che la scuadre e à tacât a ingrandîsi al è diventât simpri plui dificil lavorâ in maniere eficiente in cheste situazion.
Ce che o sin daûr a costruî a Malmö al è ce che o varessin fat se in dì di vuê o vessin vût di partî di zero cun Hattrick, fuarts de nestre esperience dai ultins dîs agns. O sarìn une scuadre plui compate, direte dai fondadôrs, dulà che ducj a san miôr ce che a son daûr a fâ i coleghis, e dulà che no smetarìn mai di tabaiâ su ce che o podin fa par miorâ Hattrick. O cirarìn di sedi plui concentrâts, lavorant su pôcs progjets ae volte, e no lassant a miezis i progjets, come che o vin fat timp indaûr.
O cirarìn ancje di sedi une scuadre plui vierte, ti contarìn ce che o sin daûr a pensâ e su ce che o sin daûr a lavorâ, e o coinvolzarìn di plui la comunitât cuant che e saran di cjapâ decisions su la direzion che al varà di cjapâ Hattrick.
Par nô, cheste e je une ripartince te maniere di lavorâ cun Hattrick. No crodìn che voaltris utents o viodarês diferencis in prin, ma al sarà un cambiament positîf lant indenant cul timp te maniere che o lavorarìn su gnovis funzions, te risoluzion des falis e te comunitât.
Une des conseguencis dal cambiament e je che par un pôc o ralentarìn la introduzion di gnovis funzions tal zûc - ma chest al è alc che o vevin decidût di fa in cualsisei câs. Cul gnûf motôr di zûc in vore, o volin concentrâsi su altris areis di interès, come tornâ a vierzi il program CHPP.
Une altre robe impuartante e je che tancj dai nestris svilupadôrs a Stocolme a àn decidût di no vignî cun nô a Malmö, e par chest o vin gnovis personis che ju sostituiran.
O vin ancje viert une pagjine di assunzion chi su Hattrick dulà che o comunicarìn i puescj libars. Se tu âs pensât di vigni a vore par Hattrick, ti conseìn di dâ un cuc - ancje se al moment nol è un lavôr che al fâs par te, sintiti libar di mandânus un CV tal câs che al saltedi fûr alc plui indevant.
O savìn che la fûr a son tancj talents e o sin une vore contents des assunzions che o vin fat jenfri la comunitât tai agns passâts.