Fin dai prins timps, i utents di Hattrick a àn creât i lôr prodots par miorâ la esperience di zûc. Tai agns 90 o vin metût a disposizion dai plui creatîfs la pussibilitât di discjamâ i dâts de scuadre, in maniere che a fossin plui facii di analizâ e organizâ. Man man che Hattrick al cresseve, a cressevin ancje i prodots gjestionâi, i sîts di statistichis, i visualizadôrs e dute une altre schirie di prodots. Dal 2001, o vin fat partî une rêt uficiâl di svilupadôrs clamade CHPP (Certified Hattrick Product Providers). CHPP al è cressût insiemit a Hattrick e ce che par nô e jere une maniere par permetinus di concentrâsi sul cûr dal zûc, lassant svilupâ ai utents lis funzions che no no vevin timp di meti adun, e je deventade une gruesse imprese par so cont. Tal 2006, o vin decidût di sospindi in vie temporanie la concession CHPP ai gnûfs prodots - une sierade temporanie che e je durade cuatri luncs agns.
In dut chest timp, i programs CHPP a son restâts une part impuartant di Hattrick, doprâts di desenis di miârs se no centenârs di miârs di utents. Par chest, o sin une vore contents di anunziâ CHPP 2.0, il tornâ a fâ partî la rêt, che e includarà:
* Ducj i prodots CHPP a scomençaran a doprâ un gnûf metodi di autenticazion cuant che a jentraran te tô utence. In chest sisteme, tu varâs simpri il control di cuai prodots a podaran acedi ai tiei dâts e cemût che a podaran acedi a chescj dâts. Nol sarà plui necessari da il codiç di sigurece ai svilupadôrs CHPP - ducj i permès a saran gjestîts dentri Hattrick. I prodots CHPP esistents a varan 6 mês di timp par adeguâsi al gnûf sisteme.
* Il gnûf portâl CHPP al rindarà plui facil la ricercje di prodots adats a ti. Chest al dâ ai svilupadôrs CHPP une maniere miôr par promovi i lôr prodots jenfri Hattrick.
* O sin daûr a meti adun gnûfs dâts XML pai svilupadôrs CHPP, che par te al vûl disi gnovis funzions. Al sarà ancje pussibil doprâ la interface CHPP par gjestî la tô scuadre cun aplicazions esternis. Il prin pas al è stât fat cun la nestre aplicazion par Facebook, che cumò tu puedis doprâ par organizâ amichevulis.
* O vin inzornât lis regulis che e rivuardin CHPP, par rindi il procès plui sempliç sei pai svilupadôrs sei par nô. Regulis plui claris, mancul ritarts, mancul restrizions su ce che si pues svilupâ (cumò si puedin fâ ancje aplicazions pai telefonins!), e plui facil punî cui che nol rispiete lis regulis.
* Ultin, ma no mancul impuartant, tornant a vierzi CHPP o vin decidût che o continuarìn a miorâlu dal moment che o pensìn che al sedi un aspiet maraveôs de comunitât di Hattrick. O vin verementri voie di sburtâ lis gnovis ideis e i gnûfs progjets dal moment che chescj e mioraran ancje Hattrick. Par chei che no àn ancjemò scuviert CHPP, vait a da un cuc - al è plen di bogns prodots bielzà disponibii, e tancj altris a rivaran.
Sei che tu vedis za sintût tabaiâ di CHPP, sei no, tu puedis viodi cuâi prodots che a son disponibii
chi.