Novitâts

Nô o metin a disposizion une cjase. Tu tu i dâs la vite.

Cheste in struc e je la sostance di Hattrick, e al è simpri stât cussì tai nestris cjâfs tant che lu svilupavin. Noaltris o metìn a disposizion la cjase dulà che ducj o vivìn, ma o seis voaltris che di fat la jemplais di vite. E ce che mi plâs in particolâr al è podê lei lis straordenariis storiis des scuadris e dai zuiadôrs di Hattrick, o di personis dongje a une scuadre che un nol varès mai pensât che a podedi esisti. Chestis storiis e jemplin di vite la nestre cjase; vite che ducj o podìn gjoldi!

Nol è mai stât masse facil creâ e condividi cun altris la vite atôr de tô scuadre, soredut par cui che nol è Supporter. Ma cui Widget di Hattrick e forsit ancjemò di plui cun Hattrick United, cumò al è une vore sempliç scomençâ a creâ e a condividi lis storiis su la tô scuadre, e al è un puest comun dulà che o podìn gjoldisi chestis storiis.

Hattrick Widgets
Su Hattrick Widget tu puedis cjatâ une vore di imprescj personalizâts che tu puedis doprâ sul to sît o blog e se tu sês un Supporter, tu varâs acès ancjemò a plui widget. Hattrick Widget al è un prodot CHPP e al funzione su la maiôr part des plateformis (chês che a permetin di doprâ javascript).

Hattrick United – il nestri portâl di blog
Hattrick United al è basât su Wordpress, probabilmentri la plateforme di blog plui potente che si cjate atôr. Al è une vore facil creâ un blog, e tu cjatarâs ducj i Hattrick Widget disponibii. Se tu sês un Supporter, tu varâs plui opzions di personalizazion dal blog e la pussibilitât di acedi a plui widget.

Cuant che tu vierzis un blog di scuadre su Hattrick United, ti ven dât un leam al blog e il to ultin messaç al ven zontât ae pagjine de scuadre su Hattrick. Se tu sês un Supporter, ancje lis ultimis gnovis a vegnaran mostradis in automatic. I gjestôrs che a visitìn la tô scuadre su Hattrick a cjataran ancje il leam al blog.

Se tu âs bielzà un blog, ma tu vuelis trasferîlu su Hattrick United la operazion e je avonde semplice. Par vê plui informazions - o se tu âs dome voie di gjolditi cualchi storie - dâ un cuc a hattrickunited.org.

O soi cussient che no ducj a crearan un blog, ma o pues racomandâ di lassâ cori la fantasie. No parcè che chest al rindarà plui plasevule la esperience di chei altris (ancje se lu fasarà), ma parcè che o soi cuasi sigûr che tu ti gjoldarâs la vite su Hattrick ancjemò di plui rispiet a cumò. Al fâs la diference!

Tirâ fûr il miôr di Hattrick
Tal plan gjenerâl, Hattrick Widget e Hattrick United a son pas te stesse direzion come ancje la re-vierzidure di CHPP: o volìn rindi Hattrick plui viert aes iniziativis dai utents e dati la pussibilitât di sedi plui creatîf tal mont dal zûc. In struc, o vin voie di dati i imprescj par tirâ fûr il miôr di Hattrick - in cualsisei puest al podedi sedi. Parcè par nô al è une vore impuartant che tu podedis gjolditi Hattrick par dut, pluitost che dome sul sît.

O savìn ancje che la maiôr part dai gjestôrs no contribuìs in maniere ative ae comunitât. Ancje se o pensi che tancj si gjoldin il sedi part de comunitât e la energjie che cheste a puarte al zûc - tancj altris a vuelin pensâ a Hattrick dome come a un zûc. E chest al è un aspiet che o vin di rispietâ. Duncje o vin bisugne di cjatâ un bon belançament jenfri lis funzions pe comunitât e chês pal zûc in se, e no lassà che la prime a diventi une distrazion masse grande rispiet al zûc.

La tiere di mieç perfete
Ce che o ai dit chi parsore e je la reson par ce che o vin tignût i blog intun sît separât di Hattrick, ma e son ancje altris mutîfs. Un di chescj al è che o podìn facilmentri doprâ une plateforme di blog (Wordpress) esistente e potente, e duncje no vin di svilupâ une internamentri. Chest al vûl ancje disi che o podìn assegnâ chest progjet a un svilupadôr esterni, cence doprâ un dai nestris; o podìn semplicementri svilupâ Hattrick United cence distrai risorsis dal svilup di Hattrick.

Ancjemò plui impuartant, o pues disi che Hattrick United al cree la perfete tiere di mieç dulà che o podìn promovi lis ideis e iniziativis de comunitât cun plui facilitât e cence il riscli di distrai masse i utents dal cûr dal zûc. Al sarà ancje un puest perfet par promovi lis simpatichis iniziativis de comunitât che no cjatin un puest adat tal sît principâl e che par colpe di chest e podaressin vê pocje atenzion.

A saran ancjemò i contribûts de comunitât su Hattrick
Prime di sierà, e je ancjemò une robe che merete dite: Hattrick United nol vûl disi che e sedi rivade la fin par HT Press o par altris contribûts de comunitât su Hattrick. I nestris editôrs volontariis e ducj i scritôrs di HT a fasin un lavôr preseât pe comunitât su Hattrick, e di sigûr a meretin il lôr puest e dute la atenzion pussibil. Hattrick Press e continuarà a sedi svilupade come simpri.

La comunitât e je simpri stade une part ative e vive di Hattrick. Cui Hattrick Widget e cun Hattrick United cumò tu âs plui imprescj - e un spazi condividût – par miorâ cheste part e par espandi ancjemò di plui la comunitât. Nuie mâl come principi di setemane, nomo?