Lis regulis e lis liniis vuide che o doprìn cumò e son plui o mancul lis stessis che o dopravin 10 agns indaûr, e e àn funzionât - nuie ce disi. Ma di chê volte e son sucedudis une vore di robis, sei in Hattrick sei tal mont, e cumò al è clâr che chestis stessi regulis no funzionin plui tant ben come une volte.
Duncje, ce che o vin fat al è stât domandâsi ce che o varessin fat di diferent se o vessin creât Hattrick in dì di vuê, cjapant in considerazion dut ce che o vin imparât in chescj agns. E di chi o sin partîts par creâ un gnûf insiemi di regulis e liniis vuide che si adatin a ce che al è vuê Hattrick e a cemût che o vin voie che al sedi tal futûr.
Ce che o vin voie di fa, al è di diventâ ancjemò plui amichevui tai confronts dai nestris utents, e che lis azions dai nestris uficiâi e deventin plui trasparentis. O varìn simpri lis regulis de cjase (che no cambiaran cuissà ce) e o fasarìn in maniere che e vegnin rispietadis, ma e cambiarà la maniere cemût che lis metarìn in pratiche. Cun punizions che e vedin une logjiche e che no sedin masse pesantis. Dulà che pluitost che al sarà preferibil gjavâ une funzion a un utent che si compuarte mal (come il forum, par esempli) pluitost che creâ conseguencis tal zûc (par esempli lis multis).
Vuê o screìn il prin pas di chest progjet,
pagjine di stât dal acont. O savìn che la pluipart di voaltris no varà mai bisugne di controlâ cheste pagjine, ma se al ves di capitâus di sgarâ aes regulis – chest al è il puest dulà che o podarês viodi i provediments cjapâts, in maniere trasparente e visibile al utent (visibile dome al utent interessât). E o podin ancje informâti in maniere plui precise dal parcè che une cierte azion e je stade fate tai tiei confronts e di cualis che e son lis conseguencis. Al moment si cjataran dome lis violazions des regulis dai forum, ma plui indevant si cjatarà ancje dut il rest.
Cundiplui, i moderadôrs e rindaran publichis lis lôr liniis vuide. Par ce che al inten il forum, o netarìn la "fedine penâl" di ducj i utents (fûr di chei che e son al avîs finâl), cussì si partirà ducj frescs. E son ancje un pâr di robis che e meretin sedi menzonadis:
- Se tu vegnis inibît, il to nivel di inibizion par une cierte ofese (lizere, medie, pesante) al incrès di un.
- Un moderadôr nol decidarà plui la durade de inibizion. I Mod e decidaran "dome" se cualchidun al à sgarât lis regulis e cuale che e je la tipologjie de violazion. Il sisteme al gjestirà di bessôl la durade de inibizion.
- Se tu vegnis inibît, la tô fedine e tornarà nete cul timp (cetant timp al dipent de gravitât de violazion) se tu scomencis a compuartâti ben e a seguî lis regulis.
- Se tu vegnis inibît dal forum, no tu varâs nissun acès al forum par dute la durade de inibizion.
Ten di ments che chestis modifichis des regulis no vignaran fatis vie pe gnot. Al è un procès che al à bisugne di timp (al mancul dut il rest dal an). La plui part di chest lavôr al è interni e duncje nol sarà visibil, ma la diference si notarà. Par ducj, sei par chei che e zuin di agns, sei par chei che si iscrivaran un doman.