Ducj chei che e pensin di ve lis cualitâts necessariis e puedin partecipâ. E saran un o dôi Ambassadôrs par ogni paîs che di fat e deventaran i rapresentants des lôr comunitâts. I Ambassadôrs e àn di sedi bielzà coinvolts in cualchi maniere te vite de lôr comunitât di Hattrick e e varan di cjatâ storiis interessantis, scrivi alc su chestis e mostrâlis al rest dal mont. I Ambassadôrs e varan ancje di judânus te promozion dal zûc, judânus a cjatâ i puescj miôr par fa publicitât a Hattrick tal lôr paîs (nol è nissun sostitût pe cognossince di un che al vîf intun puest). Un altri recuisît e je la cognossince de lenghe Inglês.
I Ambassadôrs e son interessâts a judâ la incressite des comunitâts locâls di Hattrick e a miorâ la comunicazion jenfri lis comunitâts. E àn di vê voie di sedi coinvolts e di promovi la organizazion di events locâi te comunitât. Ogni potenziâl ambassadôr al à di sedi espansîf, sociâl e un grant comunicadôr. Cundiplui, jessint il rapresentant de comunitât, un Ambassadôr al à di sedi une vore educât e rispietôs!
Se tu pensis che ti plasarès sedi coinvolt in chest e tu vuelis candidâti par sedi il prin Ambassadôr dal to paîs,
dopre la schede di contat par contatâ i Ambassadôrs Esperts e rispuindi aes domandis chi sot (in Inglês):
• Parcè vuelistu diventâ un Ambassadôr di Hattrick?
• Ce cualitâts âstu che ti fasin sedi la persone plui adate par cheste posizion?
• Cetant sêstu stât coinvolt te vite de comunitât di Hattrick? Sintiti libar di segnalâ articui, discussions dai forum o altris robis che tu âs fat.
• Âstu bielzà ideis su cemût promovi Hattrick tal to paîs fûr dal zûc? Nol è necessari, ma nus plasarès lei ce che tu âs pensât.
• Âstu mai vût problemis cun GameMaster o Moderadôrs che ti vedin puartât a cjapâ multis o a sedi bandît?
Se tu vuelis une descrizion plui complete di ce che tu varâs di fâ come Ambassadôr, lei chi sot, ma ten di ments che come Ambassadôr tu varâs ancje la pussibilitât di decidi cemût doprâ lis tôs risorsis. O sin chi par judâti!
Lis candidaturis pal prin grup di Ambassadôrs e staran viertis su par ju dôs setemanis, fintremai Martars ai 20 di Avost e tu sarâs contatât in câs di sucès. Buine fortune!
Compits dai Ambassadôrs: • Cjatâ storiis interessantis de comunitât locâl di Hattrick e scrivi alc su chestis, o judâ cualchidun a scrivi alc, par che e vegnin publicadis su Hattrick Press o Hattrick United.
• Organizâ o judâ a promovi competizions jenfri i membris des comunitâts locâls, come par esempli concors pes scuadris Nazionâls o sfidis di fin stagjon.
• Judâ i HT a cjatâ puescj/metodis par publicizâ Hattrick tal lôr paîs. Costruî une liste di contats tal paîs dal Ambassadôr che e podarà sedi doprade di Hattrick par promovi il zûc cun variis strategjiis.
• Organizâ o partecipâ ai incuintris jenfri utents di Hattrick. Sedi la presince uficiâl di Hattrick par chescj events, scoltâ i pinsîrs e lis ideis dai utents e scrivi alc su la esperience fate.
• Condividi informazions, conseis e storiis cun chei altris Ambassadôrs e lavorâ insiemi par continuâ a miorâ la eficacie dal program. Cundiplui e varan di cjatâ i contignûts locâi plui interessants e publicâju a nivel globâl.
• Sparniçâ la vôs su Hattrick su lis rêts sociâls o muse a muse, sei doprant storiis interessantis scritis dai Ambassadôrs sei plui in gjenerâl.