Novitâts
11-8-2013
Editoriâl: Gnûfs Presits Supporter
Vuê o comunichìn i gnûfs presits pal Hattrick Supporter, e ancje la pussibilitât di rinovazion automatiche. I cambiaments e scomençaran dal 14 di Novembar.
Come che o savês, Hattrick al è tornât tes mans dai siei fondadôrs in Avost. Chest al è sucedût parcè che Zattikka, la compagnie che o vin vendût Hattrick 18 mês indaûr, e je restade cence bêçs. O sin une vore contents di sedi tornâts e par nô chescj e son stâts mês impegnatîfs, lavorant ae transizion dal zûc a une compagnie indipendente, fasint progjets pal svilup dal zûc e controlant cemût che e van i afârs.
Il problemi plui grant par nô al è che prime di falî, Zattikka e à spindût ducj i bêçs che e jerin stâts paiâts in anticip pal Supporter. E son lâts a finîle tal grup di Zattikka come cualsisei altri vuadagn e e son stâts doprâts. Cumò, sei Zattikka che i bêçs e son sparîts. Chest al vûl disi che cuant che o sin tornâts a comprâ Hattrick, o vin cjapât su un grant debit tai confronts dai nestris Supporter. In altris tiermins, i nestris utents e àn un grum di Supporter che o continuarìn a mantignî par agns, ma no cjaparìn nuie fintremai che no sarà ore di fa lis rinovazions di chescj Supporter. Dal moment che Zattikka e je stade une vore agressive tal vendi estensions dal Supporter cuntun grum di scont, o vin un numar une vore grant di Supporter tal sisteme e o savìn che i nestris vuadagns e saran une vore plui bas dal normâl par un grum di timp.
O vin analizât la situazion par viodi ce che o podìn fa par sedi sigûrs di rivâ a mandâ indevant Hattrick par i agns a divignî. O vin voie che Hattrick al vedi vuadagns sigûrs cumò e pal futûr. Lu san ducj che Hattrick nol è plui un zûc in cressite e o vin voie di sta in pîts ancje se o diventarìn plui piçui di ce che o sin cumò. Par fa chest o vin di cirî manieris par vuadagnâ di plui cui utents che i tegnin al zûc.
E saressin disponibilis opzions che no vin voie di cjapâ in considerazion.
No fasarìn diventâ Hattrick un zûc a paiament. Chest al ridusarès i coscj e magari al "sfuarçarès" cualchi utent a diventâ Supporter, ma chest al è alc che no vin voie di fa dal moment che o vin simpri prometût che Hattrick al sarà simpri gratis.
E no introdusarìn nancje funzions a paiament che e dan un vantaç tal zûc. O vin voie che Hattrick al sedi un zûc coret, dulà che i utents che no pain e àn lis stessis pussibilitâts di vinci dai utents che e pain, ancje se magari e àn di lavorâ un pôc di plui. Duncje no fasarìn nancje chest.
Invezit, o vin decidût di alçâ il presit dal Supporter. E al sarà un aument significatîf.
O savìn che i auments di presit no son mai ben viodûts, ma o savìn ancje che tai agns il Supporter al à vût un presit une vore plui bas di chel che i utents e son pronts a paiâ te realtât. O vin fat un studi sui presits che al mostre che chest al è ancjemò vêr, e chest al è il moment che o vin bisugne di cheste jentrade in plui.
Chest nus darà la pussibilitât di investî tal zûc e tal Supporter, cence il riscli di introdusi gnûfs modei di marcjât. E ancje se al moment no vin nissune gnove version dal Supporter, il miorament dal Supporter al à un puest impuartant tai nestris plans pal prossim an.
Cuant che al è stât dât fûr il Supporter Platin, lis intenzions e jerin che al fos un tip di abonament esclusîf, e che no plui di un cuart dai Supporter al fos Platin. Vuê, plui di metât dai Supporter e je Platin, che al indiche che i dôi pachets e àn un presit masse simil. O vin voie che Aur al sedi il pachet preferît dai nestris utents e duncje o vin decidût di aumentâ la diference di presit jenfri Aur e Platin, in maniere che il Platin al sedi plui cjâr dal Aur dal 25% - 30%.
Cundiplui che alçâ il presit, o introdusarìn la pussibilitât di paiâ mensilmentri in maniere automatiche. O sperìn che cheste gnove forme di abonament, che no oblee a paiâ dut intun colp, e fasedi gole a plui di cualchidun in e che nus judedi a supuartâ e svilupâ Hattrick. Cuntun abonament mensîl, il Supporter al sarà disponibil par mancul di €3.50 pal Arint, €7 pal Aur e €9 pal Platin. Al sarà ancjemò pussibil comprâ il Supporter in tais di 6 o 12 mês, cun grancj sconts su la rate mensîl. E i utents dai paîs in svilup e continuaran a vê presits plui bas.
I gnûfs presits e la rinovazion automatiche e laran in vore a partî dal 14 di Novembar, che al vûl disi che ducj i utents e varan la pussibilitât di estindi il Supporter cul vieri presit pai prossims sîs dîs.
Une volte di plui, si rindìn cont che chescj cambiaments no saran popolârs, ma o crodìn che e sedi la maniere miôr par sigurà un futûr a Hattrick e o sperìn che voaltris o podedis capî la nestre sielte.