Novitâts

Une des sfidis plui interessantis par cualsisei gjestôr di Hattrick e je chê di belançâ la scuadre e lis tatichis par vignî incuintri ai bisugns dal campionât, dal alenament e di fâ une buine corse ae Cope. E ancje se nus plasìn une vore lis Copis in Hattrick al è clâr che il sisteme al à bisugne di sedi miorât. Prime di dut e son limitadis in dimension, tal sens che no dutis lis scuadris e àn la pussibilitât di zuiâ in Cope. Cundiplui, pe plui part des scuadris che e partecipin ae Cope, la esperienze si ridûs a zuiâ une o dôs partidis al massim. Cheste e je une conseguence naturâl de struture de Cope di Hattrick, dulà che o vin voie di fâ partecipâ il plui alt numar di scuadris pussibil E rivâ a zuiâ la finâl tal zîr di une stagjon cuntune partide ae setemane.

Cul gnûf sisteme de Cope, o vin voie di mantegni ce che al è di bon des Copis - come il benefici par ogni scuadre che e rive a restâ in Cope par tant timp e il savê che e je une competizion che dure dut il campionât e che e produsarà un campion degn di chest non. Ma o vin ancje voie di fa in maniere che pe maiorance des scuadris, la Cope sedi alc di plui che furnî cjar di canon a une grampe di scuadris di alt nivel che e àn une pussibilitât realistiche di vinci. Al è par chest che o stin puartant grues cambiaments a cemût che e funzionin lis Copis in Hattrick.

Cope Nazionâl e Copis di Division

Il cambiament principâl al è che o dividìn lis Copis in dôs categoriis. Tai campionâts che e àn fintremai a sîs divisions e sarà dome la Cope Nazionâl, ma pe prime volte dutis lis scuadris e parteciparan ae Cope Nazionâl. Tai campionâts plui grancj, o zontarìn la Cope di Division par dutis lis divisions sot de Serie 6 dulà che e zuiaran dutis lis scuadris des seriis plui bassis. Te Cope di Division tu zuiarâs dome cuintri scuadris te tô stesse serie e ae fin de stagjon al vegnarà nomenât il Campion di chê specifiche Cope di Division.

Cope Sfidants

Sei la Cope Nazionâl sei par chê di Division e saran acompagnadis di copis secondaris e terziaris. Chestis e son Copis di nivel plui bas dulà che e parteciparan lis scuadris che e vegnin eliminadis de Cope principâl. Chest al vûl disi che pierdi une o dôs partidis no sarà la fin de tô esperience in Cope pe stagjon. E saran garantidis almancul trê partidis di Cope par stagjon, ma se tu pierdis intune des primis partidis tu vegnarâs spostât intune Cope dulà che probabilmentri il nivel al sarà plui ae puartade de tô scuadre. Tu varâs simpri la pussibilitât di vinci une Cope, ancje se mancul impuartante.

Il sisteme de Cope Sfidants al sarà formâ di cuatri competizions diferentis, ogniune cul so trofeu e cul so vincidôr.

Copis che e jentrin te struture di Division

In dì di vuê al è complicât savê se la tô scuadre e parteciparà ae Cope o no. Chest al è dovût al fat che il numar di scuadris che e partecipin ae Cope nol corispuint al numar di scuadris di Hattrick, o ancje dome aes divisions che e partecipin. Il risultât al è che no sin mai rivâts a includi dutis lis scuadris te Cope Nazionâl - o vin simpri vût bisugne di doprâ la classifiche di Cope par decidi dulà tirâ la linie jenfri lis scuadris che e partecipin e chês che no lu fasin. Cun chest gnûf sisteme o cambiarìn cheste cundizion in maniere che la Cope e sedi adate al sisteme di seriis atuâl. La Division dulà che tu zuis e determinarà la Cope che e zuiarà la tô scuadre che e sarà la stesse par dutis lis scuadris de tô Division. Par jemplâ la Cope o zontarìn une schirie di scuadris di 'cuartîr' temporaniis - scuadris di nivel une vore bas che e zuiaran cuintri lis scuadris plui fuartis tai prins turnis di Cope. A nivel di competizion chest nol è tant diferent di ce che al sucêt in dì di vuê.

Plui partidis zuiadis in cjamp neutri

Tal gnûf sisteme di Cope, lis partidis si zuiaran in cjamp neutri prime des semifinâls. Prime che chest al sucedès e jerin dome doi turnis dulà che si zuiave in cjamp neutri (lis semifinâls e lis finâls), ma cumò lu si fasarà dai ultins 6 turnis. O vin voie di sbassâ il vantaç de scuadris di cjase in Cope parcè che al moment al zuie un rûl masse impuartant par determinâ il vincidôr de Cope e chest vantaç al devente ancje plui impuartant man a man che la Cope e va indevant.



Vantaçs dal gnûf sisteme

Ce che o vin voie di otegni cun chest gnûf sisteme, al è di da a plui scuadris pussibil la pussibilitât di miorâ la proprie esperience in Cope. O crodìn di ve centrât chest obietîf in plui manieris: e son plui scuadris che e àn la pussibilitât di zuiâ in Cope e che e àn plui pussibilitâts di lâ plui indevant dai prins dôi turnis. Pes scuadris plui fuartis, la Cope Nazionâl e sarà plui compate e competitive - ma e sarà plui alte ancje la ricompense ae fin. Chei che e vegnin eliminâts tai prins turnis e varan une seconde e ancje une tierce pussibilitât di vinci un trofeu nazionâl.

Un altri vantaç al è che al sarà plui impuartant rivâ a sedi promovûts. Sedi promovûts al da la pussibilitât di partecipâ a une Cope plui impuartante e tal câs che tu partecipedis bielzà ae Cope Nazionâl, la promozion ti permet di vê une posizion plui alte te classifiche di Cope.

Cualchi scuadre e sielç di restâ in Divisions une vore bassis par vê plui pussibilitâts di lâ indevant in Cope. Cheste strategjie e varà di cambiâ parcè che cumò si varà di sedi almancul inte Division 6 par podê partecipâ ae Cope Nazionâl. Chest al puartarà plui ecuilibri tes divisions plui bassis, dal moment che chestis super-scuadris e varan convenience a fasi promovi in divisions di plui alt nivel.

Gjerarchie di Cope

Un aspiet une vore impuartant dal ridisegnâ lis Copis al è stât chel di fâ in maniere che lis scuadris e vedin voie di restâ te Copis plui impegnativis il plui a lunc pussibil. No vin voie di viodi scuadris che e decidin di abandonâ la Cope primarie par vinci cun facilitât la Cope secondarie o terziarie. Lis Copis minôrs e àn di sedi une alternative valide dome pes scuadris che no varessin altris pussibilitâts di lâ indevant.

Chest al sarà otignût in dôs manieris: doprant ricompensis economichis (premi monetari e di spetadôrs) e doprant efiets sul spirit di scuadre.

Premi monetari e Spetadôrs

Come bielzà dit, a partî de prossime stagjon il premi monetari al sarà incressût une vore sei pe Cope sei pal Campionât. Come part dal ridissen de Cope o scomençarìn a dâ premis monetaris a partî tai prins turnis. Chest al fâs si che l'incentîf a lâ indevant al sedi clâr. La une vore indevant te Cope Nazionâl al sarà une vore plui convenient rispiet a vuê. Pes Copis Sfidants, i premis e saran une vore plui bas, ma simpri plui alt rispiet a zuiâ une amichevule. La presince dai spetadôrs e restarà invariade rispiet a vuê par ce che al inten lis Copis primaris e e sarà simile a chê des amichevulis internazionâls pes copis minôrs. Pe liste complete dai premis controle il Manual.

Efiets sul Spirit di Scuadre

Dome lis partidis de Cope Nazionâl e di Division primaris e varan efiets sul spirit di scuadre. Cuant che si zuie intune des copis minôrs, il spirit di scuadre al funzionarà come pes amichevulis - duncje nol sarà pussibil doprâ 'Cjapile cun calme' o 'Partide de stagjon' par modificâ il spirit di scuadre.