Novitâts
9-26-2014
Editoriâl: Prossim: Hattrick par telefon fat come che si devi
E je di gnûf ore di contâus i nestris plans par Hattrick. Dal moment che o vin bielzà screât un pocjis di novitâts che e àn a ce fâ cul zûc, come il gnûf sisteme dal Staff e la gnove formule des Copis, o vin decidût di risolvi une volte par dutis il probleme dal acès a Hattrick cun dispositîfs mobii. Il nestri progjet principâl par l'autun al è di creâ une version mobil dal sît di Hattrick e lis aplicazions pes plateformis iOS e Android. Dut gratis come simpri.
Tai ultins agns al è diventât clâr che Internet pai dispositîfs mobii al è simpri plui impuartant e simpri plui personis e doprin Internet di un telefon o un tablet pluitost che di un computer. Chest lu savìn sei par esperience personâl sei pal fat che lis statistichis di acès a Hattrick e mostrin une cressite dai dispositîfs mobii e un câl dai computer. Ancje se il nestri sît al funzione avonde ben ancje sui dispositîfs mobii, al è une vore lontan dal sedi disegnât par sedi doprât propit cun chest tip di dispositîfs. Chest al è alc che o vin voie di cambiâ.
Prime di dut o disìn che no cambiarìn in nissune maniere il sît atuâl, ma o stin costruint un gnûf sît (che al sostituìs m.hattrick.org) che al sarà une gnove maniere par usufruî dal stes zûc. Chest sît al sarà fat apueste pai schermis piçui e pe interface touch, cundiplui al sarà ancje convertît in aplicazions instalabilis pes plateformis mobilis plui impuartantis. O vin simpri vût voie che Hattrick al fos un zûc facil di acedi e di podê doprâ cuant che si à cualchi minût libar e vuê chest al vûl disi che o vin di fâ ancje lis aplicazions par dispositîfs mobii.
Te version mobil no saran dutis lis funzions dal sît classic, almancul te prime version. O savìn za che i forum, lis scuadris nazionâls e cualchi altre funzion leade ae comunitât e sarà lassade fûr al inizi. Però cheste version e varà plui funzions de aplicazion mobil atuâl e dut ce che ti covente par gjestî la tô scuadre al sarà metût a tô disposizion.
Duncje, parcè cumò e ce sucedaraial ae aplicazion uficiâl di Hattrick par iOS e Android, o aes aplicazions CHPP?
Ben, il mutîf par fâ cumò cheste mosse al è che cumò al è plui bisugn di chest tip di aplicazion rispiet a cualchi an indaûr, soredut dal moment che la esperience ufierte de aplicazion atuâl di Hattrick no je avonde buine. O vin bisugne di scomençâ di zero cuntun progjet che al vedi dome il mobil tal cjâf. Lis aplicazions di Hattrick par Android e iOS e vignaran sostituidis cun lis gnovis aplicazions. O scomençarìn cun iOS e Android, ma cul timp o podaressin fâ ancje versions par altris plateformis. Par ce che al inten lis aplicazions CHPP, o continuarìn a supuartâ i svilupadôrs par che e continuedin a fâ aplicazions sei par dispositîfs mobii sei par desktop.
E cuant saraial disponibil chest gnûf Hattrick Mobil? O pensìn di screalu pe fin di Novembar.
Tal ultin mês o sin stâts une vore impegnâts a programâ lis funzions di base de gnove plateforme. In Otubar o scomencìn a meti adun la gnove interface e ai prins di Novembar o scomençarìn a fâ i test. PAr cumò lis robis e stant lant indevant secont i plans, ma no vin voie di dâ datis ciertis pal moment. Dut câs si spietìn che tu podedis sedi a gjolditi lis mangjadis des fiestis cun la tô famee tignint sot control la tô scuadre cul telefon, cence vê bisugne di alzati de taule ienfri une puartade e chê altre. Come che al è just che al sedi!
Sta in scolte.
HT-team