Novitâts

Tai ultims mês no vin introdot gnovis funzions tal zûc, ma si sin concentrâts su altris aspiets come il tornâ a vierzi il program CHPP. Cumò o sin daûr a acelerâ il svilup e chest unvier/vierte o tornarìn a lavorâ su gnovis funzionalitâts.

Ma prime di lâ indevant viodìn ce che nus spiete pe prossime stagjon. Il finâl di stagjon al sarà avonde cuiet, ma e saran dôs novitâts.

Robis pe prossime stagjon

- Secont pas dal cambiament te riduzion di stipendi pai zuiadôrs vieris
Tal prin pas o vin cambiât il scont di 1/8 a 1/9 dal stipendi. La prossime stagjon il scont al sarà di 1/10. Par plui detais lei l'editoriâl dal 5 di Otubar dal an passât.

- Pussibilitât di cambiâ ziron te serie plui basse
Se tu zuis te serie plui basse dal to paîs, tu puedis scambiâ ziron cuntun bot prime che e scomenci la gnove stagjon. Perfet pai gnûfs utents che a àn voie di zuiâ tal stes campionât di un amì o ancje dome par cjatâ un ziron plui interessant.

Chest al sarà pussibil dome te serie plui basse (e dome pai nivei dal VII in ju), e to puedis cambiâ puest dome cuntun bot. Il periodi esat dulà che si podarà fâ il scambi al vegnarà comunicât plui indevant.

O controlarìn se pes prossimis stagjons o podarìn dâ cheste pussibilitât a plui gjestôrs.

Dut chi?
Tu podaressis pensâ: "Dut chi ce che a àn preparât?". Ben, pe fin di stagjon, si, ma o vin studiât ancje altris mioraments che no àn bisugn di sedi introdots jenfri dôs stagjons.

Prin di dut comentìn un fat che a àn notât ducj: tai ultims timps o sin daûr a pierdi utents. Di chest o vin tabaiât tai forum, dulà che dutis lis robis pussibilis e àn cjapât la colpe. Par sclarî lis robis, o ai voie di condividi un pôcs di fats.

La percentuâl di utent vieris che a restin e je la plui alte di simpri
La stagjon passade o vin vût la plui alte percentuâl di zuiadôrs vieris che a son restâts tal zûc. In struc, rispiet a chês altris stagjons, mancul utents vieris a àn lassât il zûc. Duncje, al contrari di ce che si crôt, i vieris gjestôrs no son daûr a scjampâ, anzit!
Cuale ise la reson de pierdite duncje? Ben, se nol è pe pierdite di zuiadôrs vieris, al è parcè che no jentrin avonde utents gnûfs. Par sedi plui clârs, rispiet a chei altris agns, i gnûfs utents che a restin a son di mancul.

E je ore di cambiâ la introduzion al zûc
Al è un pôc che o vin tal cjâf plans par miorâ la esperience dai novizis, e pensant a ce che o ai scrit parsore si sin acuarts che chescj plans a àn di ve la prioritât sul rest. Al principi dal an o vin tacât a lavorâ suntune gnove introduzion al zûc pai gnûfs iscrits. Une introduzion basade suntune storie, che e inclût une spiegazion dal zûc e un jutori miorâts. L'obietîf principâl al è di dâ ai gnûfs utents une esperience di zûc fantastiche tal prin mês. E des reazions che o vin vût tal blog, tai forum e di bande di gnûfs utents, o crodìn di sedi su la strade juste.

Dal moment che tu no tu sês plui un gnûf utent, no tu viodarâs nuie di dut chest, ma se tu sês curiôs ti racomandi di lei il nestri blog dai svilupadôrs.

Presentazion de partide e riscuintris
Al moment, la gnove introduzion al zûc e je il progjet primari e plui impuartant, ma o vin ancje altris robis in vore. Robis pensadis par voaltris, i gjestôrs atuâi. La prioritât in chest câs e je ce che si pues clamâ presentazion de partide e riscuintris su la partide. In peraulis puaris, dâti une esperience miorade e plui aprofondide des tôs partidis.

Cundiplui o vin voie di dâti valutazions miôr e plui detaiadis, in particolâr chês de scuadre. O volìn dati la pussibilitât di vê no dome la medie des valutazions, ma ancje la valutazion de scuadre intun ciert moment de partide. In cheste maniere, al sarà plui facil par te capî in ce maniere che la resistence e influìs sul rindiment de scuadre e il contribût des sostituzions. In pratiche, la tô abilitât di analizâ une partide e la prestazion de tô scuadre, e sarà puartade a un nivel plui alt e e incressarà la tô comprension dal zûc. E - o olsi a disi - e incressarà ancje la gjoldibilitât dal zûc.

Ancje se il miorament des valutazions al è il gruès dal lavôr, o fasarìn in maniere di incressi la comprension dal zûc miorant il riscuintri che tu âs dai events e altris situazions che si verifichin te partide. Chest par fâti diventâ un gjestôr plui brâf e par fâti capî parcè che tu âs pierdût une partide che tu varessis vût di vinci e vicevierse.

Progjet Staff
O ai menzonât chest progjet intun dai miei editoriâi passâts, e chest al sarà il prossim grant cambiament tal zûc. Probabilmentri, o scomençarìn a lavorâ su chest progjet daspò che o varìn finût la gnove introduzion al zûc. "E cuant saraial?" O pues scuasit sintî il to pinsîr.
Ben, al dipent di trop ben che al larà indevant chel altri progjet, ma o speri che o podedin tacâ a lavorâ (scrivi codiç) su chest te vierte, che al volarès disi che al podarès sedi pront pe sierade. Ti darìn plui informazions in merit cuant che o varìn plui detais a disposizion.

Ce che o volìn pal gnûf sisteme dal staff al è plui che un inzornament dal vieri sisteme. Al varà di sedi plui diret e personâl, al varà di dâ plui informazions e riscuintri su ce che e fasin lis diferentis figuris dal staff, e sedi une sielte plui strategjiche di ce che e je in di di vuê. E al varà ancje di vierzi gnovis pussibilitâts ai gjestôrs. Un dai aspiets plui apassionants di Hattrick e di altris gjestionâi al è il fat di cjapâ decisions, e il gnûf sisteme dal staff al larà in cheste direzion. Al sarà un puest dulà che tu podarâs sielzi cemût che tu vuelis zuiâ a Hattrick, e cualis opzions tu âs voie di esplorâ.

Strategjiis pal belançament
Il gnûf sisteme dal staff al sarà disegnât ancje par miorâ il belançament des diferentis strategjiis di zûc. O vin voie che il to sucès al dipindi di trop brâf che tu sês a doprâ une determinade strategjie, e no su tropis strategjiis che tu âs timp e voie di doprâ. Come che o ai menzonât prime, cul gnûf sisteme dal staff nol sarà pussibil fa dut subit. Tu varâs di fâ une sielte, e par fâ in maniere che cheste sielte e sedi plui interessante o vin di fâ in mût che lis diferentis strategjiis e sedin belançadis une cun chê altre.

E son ciertis strategjiis che o varessin voie che e vegnin dopradis di plui. O volìn che al sedi vantazôs tignî i zuiadôrs in scuadre par un timp plui lunc rispiet a cumò, e che i zuiadôrs des zovanîls e vedin un valôr plui alt. Tancj (la plui part?) dai gjestôrs a zuin bielzà cussì, ma in di di vuê al è plui convenient doprâ altris strategjiis. Duncje lentamentri e gradualmentri si movarìn in cheste direzion.

Di chê altre bande, e son strategjiis che o crodìn e vedin di sedi mancul buinis di cumò. Une e je chê di ingrumâ bêçs. Magari no l'ingrumâ in se, ma il vuadagn che si pues vê fasintlu. Duncje la compre-vendite e vegnarà limitade; tu podarâs simpri fâ compre-vendite, ma a saran limits su tropis operazions che tu puedis fâ.

Ti darìn gnovis detaiadis sul gnûf sisteme plui indevant, un biel pôc prime di meti in vore il sisteme.

Chest al è dut pal moment, e fin ae prossime volte - ti augurìn un bon stâ su Hattrick!