Novitâts

Cheste sierade e sarà di gnûf ore di fa ce che o pensin che al sedi plui divertent: svilupâ e miorâ il zûc. Cheste volte no si limitarìn a miorâ il lis valutazions o i rapuarts des partidis, ma o lavorarìn su lis mecanichis di zûc. E tant che o sin daûr a lavorâ o ai voie che o savedis ce che al vignarà cambiât.

Agns indaûr, une part de esperience di zûc - e un al podarès ancje disi che e jere une carateristiche dal zûc - e jere che tu vevis di capî cemût che al funzionave il zûc. Ti lassavin intindi cemût che funzionavin lis robis su par ju, ma i detais tu vevis di rangjâti a cjatâju par to cont. Tai agns, la comunitât e à scuviert - un toc ae volte - cemût che e funzionavin lis robis e in dì di vuê cuasi dutis lis mecanichis di zûc e son a cognossince dai utents.

Come risultât dal fat che ormai dut al è a cognossince di ducj, si cjatìn a scugnî jemplâ une "buse", ma no zontarìn misteri tant par fâ

Invezit, o rindarìn publics ducj i vieris misteris, fasint in maniere che dut al sedi clâr. In cheste maniere, dut al sarà plui controlât e Hattrick al vegnarà trasformât intun zûc dulà che il sucès al dipent di trop ben che tu rivis a doprâlis informazions che ti vegnin dadis, pluitost che scugnî scuvierzilis par to cont.

Par ce che mi rivuarde, e son lis decisions e il procès decisionâi che e rindin interessant un zûc gjestionâl. Vuê, su Hattrick tu cjapis un grum di decisions piçulis e grandis, ma o volarès che cualchi decision e fos plui impuartante e plui interessante - e o crôt che al moment no vedin avonde decisions di cjapâ. No ai voie di fa il zûc plui complicât, anzit o soi sigûr che al sarà mancul complicât, ma plui interessant e plui divertent di zuiâ.

Par sedi un pôc plui concret e par anticipâ alc, cuant che o lavorìn sul svilup dal zûc, chestis e son lis robis dulà che si concentrarìn di plui:

- Plui control su la scuadre.
Vuê e son robis tal zûc e te scuadre che no tu puedis controlâ plui di tant. Come par esempli la forme dai zuiadôrs, il riscli di infortunis e altri. O vûl che tu vedis la pussibilitât di controlâ chescj aspiets in maniere plui complete rispiet a cumò.

- Cjapâ decisions plui interessantis e plui impuartantis
Dal moment che tu varâs la pussibilitât di gjestî situazions gnovis, tu varâs plui decisions di cjapâ. Chestis decisions e àn ancje di sedi interessantis. Cun chest, o vûl disi che lis decisions e puedin vê sei aspiets positîfs, sei aspiets negatîfs (une decision che e puarte dome beneficis no je par nuie interessante, e je ovie) e che le influence che e varan su la scuadre e sarà clare.

- Abilitâ funzions "manuâls"
Invezit di lassâ che lis tôs decisions e vedin influence su alc che al ven fat in automatic, o vûl che e rindin disponibilis gnovis funzions/opzions (dulà che al è pussibil) che ti permetìn di puartâ des modifichis manuâls a cierts aspiets de scuadre. Par esempli, un al pues pensâ a une cierte cuantitât di "ponts" forme che l'utent al pues distribuî ai zuiadôrs.

Come al solit, ten di ments che chescj cambiaments no vignaran fats ducj di un colp vie pe gnot. No tu ti svearâs cuntun zûc completementri gnûf doman di matine. O ai dome voie di fâti capî la direzion dulà che si sta movint il svilup dal zûc e cemût che o volìn che il zûc si evolvi di cumò indenant.

Gnûf sisteme dal staff
Come che o ai menzonât al inizi, un gnûf sisteme dal staff e je le funzion che o puartarìn indevant cheste sierade. Chest gnûf sisteme si base sul progjet che o ai fat timp indaûr e che o vevi presentât intun editoriâl di dôi agns indaûr, ma e saran ancje dai cambiaments. Nol è cuissà ce strani, daspò dôi agns ti vegnin tal cjâf un grum di ideis e pinsîrs suntun argoment - e chi no je stade fate nissune ecezion. In linie di massime, lis robis e funzionaran cussì:

- Tu assumis une persone intun ciert rûl dal staff a un nivel di esperience di tô sielte. Plui alt al è il nivel e plui bulo al è il colaboradôr.

- Tu savarâs clarementri i efiets che cheste persone e varà te scuadre, dal moment che e saran scrits.

- Tu podarâs assumi dome une persone par ogni rûl dal staff, e tu varâs un numar limitât di puescj.

- Ducj i colaboradôrs e varan efiets positîfs su la scuadre, ma e podaran ancje ve efiets negatîfs

Cuant vignaraial screât?
O smicjìn a sedi pronts pal scomençament de stagjon 54, che e scomence ae fin di Dicembar. Ma prime di chê volte, ti darìn plui informazions sul gnûf sisteme dal staff.

E cun chest o auguri a ducj une biele istât!