Навіны

5 жніўня старыя ўладальнікі Hattrick (у тым ліку і я, адзін з заснавальнікаў гульні, HT-Daniel) дасягнулі дамоўленасьці з кампаніяй Zattikka па выкупе гульні.

Zattikka сутыкнулася з сур'ёзнымі фінансавымі праблемамі, якія цалкам маглі прывесьці да разбуральных наступстваў для гульні ці нават продажы яе з аўкцыёну.

Мы вельмі радыя, што нам удалося прыйсьці да пагадненьня: зараз Hattrick ў бяспецы і працягне існаваньне ў будучыні. Мы будзем па-ранейшаму разьвіваць наш праект. Усе падпіскі Supporter і Крэдыты, набытыя па правілах Zattikka, вядома ж, будуць дзейнічаць і далей.

Варта сказаць, што такі паварот падзей прымусіў нас пераасэнсаваць многія рэчы.

Калі мы вырашылі прадаць гульню больш за год таму, мы былі на раздарожжы адносна таго, што мы хочам рабіць з гульнёй. Колькасьць карыстальнікаў скарачалася, і заставалася ўсё менш сумневаў, што неабходныя тэрміновыя меры па развіцці гульні.

Zattikka дала нам вельмі аптымістычны погляд на Hattrick, яны лічылі, што змогуць разьвіць гульню і зрабіць зь яе выгадны бізнэс. І, натхнёныя тым фактам, што далучаемся да буйной кампаніі, а таксама верачы ў велізарныя пэрспэктывы нашага праекта, мы прадалі гульню.

Але як часта бывае, хутка выявілася, што ўсё ня так проста. Аказалася, што праца ў вялікай адкрытай кампаніі патрабуе выкананьня вялікай колькасьці адміністрацыйных функцый, а на крэатыўныя аспэкты проста не застаецца часу. А яшчэ яна патрабуе шмат грошай. Так атрымалася, што разьвіваць гульню стала значна даражэй і цяжэй, чым раней.

Усё больш увагі стала надавацца кароткатэрміновай кампаніі з мэтай атрыманьня даходу ад існуючых карыстальнікаў.

Вы, напэўна, памятаеце гэтыя бясконцыя сэрыі спэцыяльных прапаноў і зьніжак. Многія лічаць (і гэта меркаваньне я таксама падзяляю), што «старых» карыстальнікаў больш за ўсё і раздражняў той факт, што многія рашэньні і ўкараняемыя новаўвядзеньні былі занадта недалёкімі - без доўгатэрміновай пэрспэктывы. Тады як мы, прымаючы якое-небудзь рашэньне, заўсёды адштурхваліся ад думак аб доўгатэрміновым разьвіцьці гульні. Як аказалася, такое бачаньне дрэнна спалучаецца з працай у вялікай кампаніі, дзе патрабуюць справаздачы аб дасягнутых выніках кожныя 3-4 месяцы.

Мы ўсьвядомілі сваю памылку. Цяпер, атрымаўшы кіраваньне над Hattrick назад, мы зразумелі, што стан спраў значна горш за тое, што было, калі мы заключалі зьдзелку аб продажы. Карацей кажучы, вялікая колькасьць падпісак на Supporter была прададзена зь неймавернымі зьніжкамі, а грошы сышлі Zattikka, у кампанію, якая наўрад ці зможа праіснаваць доўгі час.

У сярэднім, сёньняшні ўладальнік падпіскі на Supporter мае ў запасе больш за 270 дзён да неабходнасьці падоўжыць падпіску, што ў два разы вышэй аналягічнага паказчыка 18 месяцаў таму. Гэта азначае, што мы трапілі ў складаную фінансавую сітуацыю, і для яе нармалізацыі спатрэбіцца больш за год. Мы павінны знайсьці лепшыя спосабы заробку грошай, чым Zattikka. На жаль, гэта азначае, што прыйдзецца спыніць усе кампаніі і спэцыяльныя прапановы, а магчыма, таксама перагледзець ідэю па розных коштах на Supporter ў розных краінах. Тым ня менш, Hattrick адназначна застанецца бясплатнай гульнёй.

Мы зноў гатовыя весьці гульню, але зараз мы хочам быць рэалістамі адносна таго, у якім стане наш бізнэс.

Аснова Hattrick сёньня, тое, што дазваляе гульні быць на плаву - гэта дружная і адданая супольнасьць карыстальнікаў, якая з намі ўжо 5-10 гадоў. У сёньняшняй сітуацыі нам ня варта заклікаць ў Hattrick новых карыстальнікаў любой цаной. Цалкам магчыма, супольнасьць Hattrick больш ніколі ня будзе расьці. Больш за тое, верагодна, адток карыстальнікаў працягнецца яшчэ некаторы час. Мы гэта разумеем і прымаем, і хочам засяродзіць нашы намаганьні на тых карыстальнікаў, якія ўжо гуляюць у Hattrick і атрымліваюць асалоду ад яе. Можа быць, нам удасца выйсьці на нейкую стабільную колькасьць карыстальнікаў, а магчыма, нават убачыць зноў рост. Але мы гатовыя і да таго, што гэтага не адбудзецца. Адзінае, пра што мы цяпер надзвычай шкадуем - пра выдаткаваны час на рэчы, якія ніяк не суадносяцца з нашым бачаньнем гульні і не накіраваныя на «ключавых» карыстальнікаў Hattrick.

У пачатку гэтага новага разьдзелу Hattrick мы зноў вернемся да невялікай каманды HT. Мы ўпэўненыя, што ўзровень выдаткаў на яе будзе прымальным яшчэ многія гады.

Мы спросьцім сваю працу шляхам адмовы ад непатрэбных пасадаў. Зь меншай колькасьцю распрацоўшчыкаў патрабуецца меншая колькасьць мэнэджэраў. Мы хацелі б зарабляць з дапамогай шчаслівых і задаволеных гульнёй карыстальнікаў, а не на рэкляме і партнэрах. Мы не зьбіраемся больш трымаць у камандзе асобных распрацоўшчыкаў для мабільных прыкладаньняў, хоць магчыма пашырэньне колькасьці і паўнамоцтваў іншых CHPP-распрацоўшчыкаў, гатовых займацца гэтым аспэктам. Гэты сьпіс можна працягваць. Наша мэта - абслугоўваць саму гульню і зьдзяйсьняць абдуманыя і неабходныя паляпшэньні і спадзявацца, што Вы іх ацэніце і працягнеце купляць Supporter ў знак падтрымкі нашай гульні.

Новая невялікая каманда будзе ўключаць такіх самаадданых і адданых сваёй справе людзей як HT-Gusy і HT-Bodin, якія падтрымліваюць HT-Daniel, які заўсёды быў гэткім негалосным начальнікам аддзела распрацоўшчыкаў. Але таксама нам прыйдзецца развітацца з некалькімі старымі сябрамі, напрыклад, HT-Klas і HT-Tjecken, што, вядома, вельмі сумна для ўсёй супольнасьці. Я ж абавязкова застануся, і разам з HT-Aartspam буду адказваць за сувязі з супольнасьцю.

Такім чынам, што наконт нашых плянаў па разьвіцьці гульні і тых новаўвядзеньняў, якія мы абяцалі раней?

Перш за ўсё, мы хацелі б пачаць усё з чыстага ліста і просім Вас з разуменьнем паставіцца да гэтага. Гэта значыць, кожнае нашае новаўвядзеньне будзе заснавана на склаўшайся сёньня асаблівай сітуацыі. Гэта значыць, некаторыя з "старых" абяцаньняў адносна новаўвядзеньняў мы, магчыма, не стрымаем. Тым ня менш, мы лічым, што новыя распрацоўкі будуць больш важнымі і актуальнымі.

На мінулым тыдні мы сабраліся і аформілі першую дарожную карту. Акрамя "святочнага галасаваньня» па новаўвядзеньням у Hattrick, якое праводзіцца ў цяперашні час, мы скончылі працу над двума праектамі, якія дасталіся нам у спадчыну ад Zattikka.

Першы тычыцца зьмены дызайну стартавай старонкі. Гэта невялікі праект, але ён мае значны і прыкметны вынік. Зараз мы хочам паспрабаваць новы дызайн і зразумець, ці выглядае ён лепш.

Другі праект датычыцца новай сыстэмы навучаньня карыстальнікаў. Да цяперашняга часу ён больш за месяц функцыянуе ў тэставым рэжыме, і вынікі цалкам абнадзейлівыя - колькасьць пачаткоўцаў, што затрымліваюцца ў гульні, вырасла прыкладна на 20%.

На восень у нас намечана яшчэ два праекты.

Першы тычыцца новай сыстэмы персаналу. Мы працягнем разьвіцьцё больш прадуманай, чым цяперашняя, сыстэмы, якую мы можам распрацаваць у кароткія тэрміны. Магчыма, яна ня будзе такой дынамічнай, як мы абяцалі раней. Проста мы хочам завяршыць усе гэтыя бясконцыя абмеркаваньні і абяцаньні і зрабіць працаздольную, сучасную і прадуманую сыстэму як мага хутчэй, пакінуўшы ў ёй магчымасьці для наступнага паляпшэньня.

Другі праект закліканы адрадзіць і прасунуць працу іншых распрацоўшчыкаў (CHPP). Мы лічым, што з прычыны скарачэньня колькасьці каманды HT, будзе вельмі складана ўкладваць рэсурсы ў распрацоўку мабільных прыкладаньняў. Лепшы спосаб працягнуць працу над імі і задавальняць патрэбы вялікай колькасьці карыстальнікаў - зрабіць яе даступнай і прасцейшай для іншых распрацоўшчыкаў. Яны змогуць стварыць незалежныя прыкладаньні і сайты, тым самым падаўшы разнастайнасьць і функцыянальнасьць сваіх прадуктаў. Мы спадзяемся, што новыя прыкладаньні можна чакаць ужо да канца года.

Акрамя гэтага мы працягнем працу над Supporter і іншымі гульнявымі прадуктамі, напрыклад, турнірамі. Магчыма, мы дадамо новыя платныя паслугі ў краме. Мы хочам максімальна засяродзіць увагу нашых распрацоўшчыкаў на ключавых момантах гульні, але, тым ня менш, ня можам забываць аб паляпшэньні аспэктаў бясплатнай гульні, за якія карыстальнікі ў канчатковым выніку плацяць рэальныя грошы.

Таксама, мы па-ранейшаму хочам рабіць гульню максімальна простай і даступнай для разуменьня - гэта наша шматгадовая філасофія. Таму мы вымушаны выдаліць некаторыя функцыі, якія не ўпісваюцца ў гэтую канцэпцыю і папросту не працуюць, як сьлед. Перш за ўсё, гэта тычыцца прапановы зарабіць Балы Hattrick, укаранёных па ініцыятыве Zattikka. Мы атрымалі велізарную колькасьць скаргаў на гэтыя прапановы, і мы можам толькі пагадзіцца, што бязь йіх Hattrick быў лепш. Карыстальнікі, якія цяпер маюць на сваім рахунку Балы Hattrick, будуць мець магчымасьць іх выдаткаваць. Але з гэтага моманту больш нельга іх зарабляць.

Таксама мы выдаляем старую сыстэму SMS-апавяшчэньняў. Пасьля продажу Hattrick мы страцілі кантракты, якія дазваляюць адпраўляць SMS. Паколькі ў апошні час гэты сэрвіс выкарыстоўвала толькі некалькі карыстальнікаў, мы лічым, што мэтазгодна адмовіцца ад гэтай сыстэмы зусім, чым марнаваць час і грошы на пошукі новых кантрактаў і партнэраў. Замест гэтага мы больш намаганьняў ўкладзем у сыстэму мабільных абвестак у рамках прыкладаньняў для смартфонаў, якія распрацоўваюцца CHPP-распрацоўшчыкамі.

Асабіста я вельмі рады, што мне выпаў шанец паглядзець з боку на Hattrick і яго новых уладальнікаў на працягу года. Зараз я разумею, што мы рабілі шмат няправільных хадоў і новаўвядзеньняў. Мы заўсёды лічылі, што ўсе яны павінны быць накіраваны на доўгатэрміновае разьвіцьцё гульні. І я ўпэўнены, што цяпер, калі мы атрымалі другі шанец, мы будзем працаваць значна лепш, чым у апошні год.

Мы абавязкова працягнем трымаць Вас у курсе ўсяго, што перажывае Hattrick у пачатку новага разьдзелу сваёй гісторыі. Спадзяемся, што і мы, і Вы застанемся задаволеныя новым вітком разьвіцьця нашай гульні!