2-10-2016 სისტემის გათიშვა და ტრანსფერები
გუშინ რამდენიმე საათის მანძილზე ტექნიკური პრობლემების გამო მოხდა ჰეთთრიქის გათიშვა, რაც დაახლოვებით HT დროით 18:30 საათზე დაიწყო და ხარვეზი შუაღამემდე ვერ გამოსწორდა. გათიშვა ჩვენგან დამოუკიდებელი მიზეზების გამო მოხდა, მაგრამ ჩვენ ძალიან ვწუხვართ აღნიშნული ფაქტის გამო, მითუმეტეს რომ ასევე შეფერხდა ის თამაშები, რომელიც დაგეგმილი იყო მხარდამჭერთა კვირეულის თასზე.
ყველაზე დიდი პრობლემა, რაც აღნიშნული ფაქტის შედეგად წარმოიშვა არის ის, რომ გათიშვის მიუხედავად ჩვენ ვერ შევაჩერეთ სატრანსფერო ბაზარი (რაც ნორმალურ შემთხვევაში ყოველთვის ხდება ხოლმე ასეთ დროს), ეს კი იმას ნიშნავს, რომ ტრანსფერების დასრულებისას აუქციონში მონაწილეობის მიღება ვერ მოხერხდებოდა მომხმარებლების მიერ და გაყიდულ ფეხბურთელთა სატრანსფერო ფასი გათიშვისას დაფიქსირებული ბოლო ფსონების მიხედვით დადგინდა, ხოლო აღნიშნული რა თქმა უნდა ცუდად აისახებოდა გამყიდველ კლუბთა ფინანსურ ინტერესებზე. ჩვენი პოლიტიკის მიხედვით, მსგავს შემთხვევებში არ იყო გათვალისწინებული ზარალის კომპენსირება, რადგან აქამდე რთული იყო რეალური ზარალის დათვლა და შემდეგ ფინანსურად ანაზღაურება, მაგრამ ამჯერად ვაპირებთ ეს წესი შევცვალოთ. ამ მომენტისათვის ჩვენ შემუშავებული გვაქვს ახალი ალგორითმი, რომელიც უკეთესად აანალიზებს ფეხბურთელთა საბაზრო ფასებს და ეს ჩვენ დაგვეხმარება კლუბების მიმართ მიყენებული ზარალის გამოთვლაში. ვეცდებით გამოთვლები მაქსიმალურად ზუსტად(თუ იდეალურად არა) გავაკეთოთ და გავითვალისწინოთ ყველა გუნდის ინტერესები. გთხოვთ მოთმინებით მოეკიდოთ ამ ფაქტს, რადგან ამ პროცესის დასრულებას სავარაუდოდ რამდენიმე დღე მაინც დასჭირდება, მანამ სანამ ყველა მიიღებს თავის კუთვნილ კომპენსაციას.
ანაზღაურება შეეხება ყველა იმ ტრანსფერს, რომელზედაც განთავსებული იყო ფსონი და აუქციონის დასასრული კი ჰეთთრიქის გათიშვის დროს დაემთხვა. ანაზღაურების პროცესიდან, ჩვენ გამოვრიცხავთ მხოლოდ ძალიან იაფფასიან ფეხბურთელებს, რომელთა საბაზრო ფასიც ნაკლები იქნება 20 000 ლარზე.
ამჟამად ასევე ვმუშაობთ ტრანსფერების ავტომატური შეჩერების მექანიზმის დანერგვის საკითხზე, რომელიც მომავალში შესაძლო გათიშვების შემთხვევაში ავტომატურად შეაჩერებს ყველა ტრანსფერს. საწყის ეტაპზე, სანამ ეს მექანიზმი სრულად მოერგება არსებულ სიტუაციას, შესაძლოა ადგილი ჰქონდეს სატრანსფერო ბაზრის შეჩერებებს იმ შემთხვევაშიც, როდესაც შესაძლოა ჰეთთრიქის გათიშვა რეალურად არც ხდებოდეს, მაგრამ ვეცდებით შეძლებისდაგვარად მცირე ვადაში მოვახდინოთ ამ უსაფრთხოების სისტემის სრულყოფა, რათა მომავალში აღარ ჰქონდეს ადგილი მსგავს შემთხვევებს.