Mer benotze Cookien - Se hëllefen eis, fir däin Hattrick-Erliefnes ze verbesseren.
Andeems de eise Site benotz, akzeptéiers de datt mer Cookien op dengem Apparat setzen an drop zougräifen.

Supporteren a Sponsoren

D'Sponsoren an d'Supportere sinn eng wichteg Source fir Recetten. Dowéinst ass et ganz wichteg, fir gutt Relatioune mat hinnen ze hunn an hinnen eppes ze bidden, sou datt hir Stëmmung gutt bleift - herno profitéiers de dovun.

Supporterstëmmung

D'Membere vun dengem Fanclub sinn immens wichteg, wann et ëm d'Économie vun dengem Veräi geet. D'Supportere bezuelen hir Memberskaarten (30 US$ pro Member) eemol pro Saison, mä virun allem décidéiert hir Stëmmung driwwer, wéi héich d'Recetten duerch d'Entréesbilljeeën am Stadion sinn.

Dee beschte Wee fir de Supporteren hir Stëmmung héichzehalen ass, fir hir Erwaardungen ze erfëllen (oder souguer méi ze bidde wéi néideg). Op der Säit "Supporteren" kanns de denge Supporteren hir aktuell Stëmmung gesinn.

Saison-Erwaardungen

Um Ufank vun all Saison wäerten deng Supporter der soen, wat se sech vun der Équipe erwaarden. Hir Erwaardungen hänke virun allem dovun of, wat déi lescht Saison geschitt ass, wat si, also d'Supporteren, deemols erwaart hunn a wat um Enn dann och passéiert ass.

Wann deng Équipe an den Divisiounen no uewe klëmmt (oder no ënne fällt), wäerte sech deng Supportere lues a lues un déi nei Situatioun upassen. Wann s de just an eng Divisioun méi héich geklomme bass, wäerten d'Supporteren net allzevill vun der erwaarden. Wann s de awer Saison fir Saison an der selwechter Divisioun stéchs, dann hunn deng Supporteren d'Tendenz fir e bësse méi ze verlaangen.

Match-Erwaardungen

D'Erwaardunge fir d'Saison hunn en Afloss op d'Erwaardunge fir all eenzele Match. Op der Säit iwwer d'Supportere kanns de gesinn, wat d'Supportere an all Match erwaarden. Generell gesot erwaarden d'Supportere méi vun engem Match, wann s de doheem spills.

Wann d'Resultat vum Match deem Resultat entsprécht, dat sech d'Supporteren erwaart haten, da si se frou, wann et ëm eng Victoire geet (a se si manner enttäuscht, wann et eng Défaite gëtt a se hate se erwaart). Wann d'Resultat besser ass wéi dat, wat se erwaart haten, dann ass hir Stëmmung natierlech nach besser. Wann d'Resultat awer méi schlecht ass, wéi dat wat se erwaart haten, da geet d'Stëmmung erof. An den éischte Ronne vun enger Saison ass d'Reaktioun vun de Supporteren op d'Resultater e bësse méi douce.

Um Ufank vun der Saison baséieren d'Erwaardunge fir e Match op den Erwaardunge fir d'Saison bei béiden Équipen hire Supporteren. Am Verlaf vun der Saison ginn déi aktuell Positioun an der Liga an d'Zuel vun de Punkte vu béiden Équipë méi wichteg. An de Coupemätscher hänken d'Erwaardunge vun de Supporteren nëmme vun den Erwaardunge fir d'Saison bei béiden Équipen of (woubäi den Niveau op deem se spillen, also d'Divisioun, och zielt).

D'Haltung vun der Équipe an d'Suen op der Bank hunn en Afloss op d'Supporteren

Denge Spiller ze soen, datt se solle relax spillen oder datt et de Match vun der Saison wier, huet och en Afloss op d'Reaktioun vun de Supporteren op d'Resultat vum Match. Wann d'Resultat sou ass, wéi se sech et erwaart haten (oder nach besser), wäert de positiven Effet duerch dat gemittlecht Spille vum Match net sou héich sinn. Wann de Match als Match vun der Saison betruecht gouf vun de Spiller, dann ass de positiven Effet méi grouss.

Wann d'Resultat méi schlecht wéi dat ass, wat se sech vum Match erwaart haten, geet den negativen Effet duerch d'gemittlecht Spillen erop, "Match vun der Saison" dogéint bremst den negativen Effet.

Wann s de vill Suen op der Bank hues, dann ass et méi schwéier, fir d'Supporter zefriddenzestellen, well se der Meenung sinn, datt s de genuch Suen hues, fir Succès ze hunn. D'Supportere vu räiche Veräiner reagéiere méi staark op Défaiten an net sou staark op Victoirë wéi d'Supportere vun aarme Veräiner. Wat däi Veräi méi räich ass, wat d'Bedeitung vun där Meenung méi grouss gëtt.

Sponsoren

D'Sponsore wëllen eng Équipe ënnerstëtzen, déi mat engem gudden "Image" duerch d'Welt leeft, mat deem se sech kënnen identifizéieren. Wat deng Équipe méi Succès huet a wat däi Fanclub méi grouss ass, wat däin "Image" besser ass (an d'Sponsoren der méi Sue bezuelen). Denge Sponsoren hir Stëmmung kanns op der Säit fir d'Finanze kucken.
 
 
Server 080