Mer benotze Cookien - Se hëllefen eis, fir däin Hattrick-Erliefnes ze verbesseren.
Andeems de eise Site benotz, akzeptéiers de datt mer Cookien op dengem Apparat setzen an drop zougräifen.

Hëllef »   Handbuch »   Training 

Training

All Woch kanns du festleeën, op wat fir en Training sech soll konzentréiert ginn. Den Effet vum Training gëtt donneschdes oder freides während der Aktualiséierung vum Training applizéiert, woubäi de geneeën Dag vum Land ofhänkt. D'Trainingsaart muss also festgeluegt sinn ir d'Aktualiséierung vum Training fir déi Woch ufänkt. Wa sech bei de Spiller eppes un der normaler Form an der Hannergrond-Form ännert, kënnt dat och dee Moment zum Virschäin.

Alter an Niveau vun de Fäegkeeten

Jonk Spiller verbesseren hir Fäegkeete méi schnell wéi al Spiller. Wéi schnell däi Spiller léiere wäert, hänkt awer och dovun of, op wéi engem Niveau seng Fäegkeet ass - wat den Niveau méi déif ass, wat et am Training méi séier geet.  Wann den Niveau vun der Fäegkeet ganz déif ass, geet den Training e puer mol méi schnell wéi op engem mëttleren Niveau. Training vu Fäegkeeten, déi schonn op engem ganz héichen Niveau sinn, ass méi lues wéi op engem mëttleren Niveau.

Niewent dem Alter an dem Niveau vun der Fäegkeet ginn et véier Faktoren, déi den Effet vum Training beaflossen: d'Intensitéit vum Training, d'Trainingsaart, den Undeel vum Konditiounstraining an d'Équipe, déi sech ëm den Training këmmert (den Trainer a seng Assistenten).

Intensitéit vum Training

Wat méi haart trainéiert gëtt, wat d'Form vun dengem Kader am Schnëtt besser ass, an d'Resultater vum Training gi besser. Du entscheets iwwert d'Intensitéit vum Training, andeems eng Zuel tëschent 0 an 100 antipps.  Wat awer méi intensiv trainéiert gëtt, wat de Risque vu Verletzunge méi héich ass. Du muss selwer décidéieren, wat fir dech am beschten ass - fro déi aner Leit am Forum.

D'Stëmmung an der Équipe geet eemoleg erop, wann d'Intensitéit vum Training staark verklengert gëtt. Wann d'Intensitéit dann nees eropgesat gëtt, geet d'Équipestëmmung natierlech erof, wann d'Spiller déi Nouvelle matgedeelt kréien. Wann s de d'Trainingsintensitéit änners, solls de net vergiessen, datt dat op d'mannst virun der leschter Aktualiséierung virum Training muss gemaach sinn.

Trainingsaart

Et gëtt 11 Trainingsaarten. Se verbesseren deng Spiller an iergendeppes. Déi verschidden Trainingsaarte fënns an der Lëscht hei ënnendrënner.

Trainingséquipe

Mat engem gudden Trainer, ass den Training méi effektiv wéi mat engem schlechten. Wann den Trainer Assistenten huet, verbessert dat d'Resultater vum Training.

Konditiounstraining

Konditioun muss all Woch trainéiert ginn, als prozentualen Deel vum ganzen Training vun der Équipe. Seng Effizienz geet erof, wann ee méi dovun trainéiert - et ass vill besser, fir all Woch e bësse Konditioun ze trainéieren wéi all puer Woche ganz vill.  Al Spiller brauchen all Woch méi Training, fir hir Konditioun ze behalen. Dat heescht, datt hire Manager de richtegen Undeel fir de Konditiounstraining muss fannen, sou datt de Kader uerdentlech kann trainéieren.  Spiller, déi an der Woch op d'mannst 90 Minutte fir deng Équipe gespillt hunn, kréien 100% vum Effet vum Konditiounstraining mat. Spiller, déi manner wéi 90 Minutte gespillt hunn (Ersatzspiller zum Beispill), kréie 75% vum Effet mat, dozou nach e gewëssen Zousaz fir all Minutt, déi se gespillt hunn. Aner Spiller, déi am Laf vun der Woch net fir deng Équipe gespillt hunn, mä awer gesond genuch sinn, fir ze trainéieren (Spiller déi eng Woch oder manner verletzt sinn), kréien d'Halschent vum Effet vum Training.

De Konditiounstraining huet en negativen Effet op d'Form vun denger Équipe; wat méi Konditioun trainéiert gëtt, wat den Effet méi staark ass.  Nëmmen déi aktuell Form, net d'Form am Hannergronn, gëtt vum Konditiounstraining beaflosst.

Wichteg Prinzipien

Wéivill Training e Spiller kritt, hänkt dovun of, wéivill Minutten hie fir deng Équipe an der vergaangener Woch op enger fir den Training relevanter Positioun gespillt huet. Mätscher, déi bei engem anere Veräi gespillt goufen, zielen nëmme fir d'Aktualiséiere vun der Form, de Spiller kritt dovu keen Training. Wann e Spiller guer keng Praxis hat oder manner wéi eng Minutt gespillt huet während der Woch kritt huet, dann trainéiert e guer näischt. Wéivill Training e Spiller kritt, hänkt dovun of, wéivill Minutten hie fir deng Équipe an der vergaangener Woch op enger fir den Training relevanter Positioun gespillt huet. Den Training soll jo och mat bësse Praxis verbonne sinn.

Wann e Spiller an enger Woch op méi wéi enger anerer Positioun gespillt huet, ginn déi 90 Minutten geholl, déi him de beschten Training ginn. Individuell Spiller Uerderen spille keng Roll beim Training.

Spiller ob der Bande kréie just halwen Training wann de am Spillobbau trainéiert ginn. Dat selwecht gëllt fir Ausseverteideger beim Säitenugrëff.

Et gëtt keen Ënnerscheed, ob de Spiller an engem Frëndschafts-, engem Coupe- oder engem Championatsmatch spillt - fir den Training sinn se all gläich effektiv. Wann s de beim Ufank vum Match net genuch Spiller um Terrain stoen hues, da verléiers de de Match Forfait, an och den Training fir dee bestëmmte Match. Net de ganzen Training vun der Woch geet verluer. Anerersäits, wann s du opgestallt hues mä de Géigner net, da gewënns du Forfait an déi 11 Spiller, déi beim Ufank vum Match um Terrain stinn, kréien den normalen Training, awer natierlech keng Erfahrung.

Klammere bedeiten, datt den Effet kleng ass. Duebel Klammere bedeiten, datt den Effet winzeg kleng ass.

Trainingsaart Verbessert ...fir...
Strofstéiss Strofstéiss All d'Spiller um Terrain, 25% Bonus fir de Strofstouss-Spezialist an de Goalkeeper
Verteidegung Verteidegung Verteideger ((All Spiller, déi am Match spillen))
Stiermertraining Buteur Stiermer ((All Spiller, déi am Match spillen))
Säitenugrëff Bande Banden (Ausseverteideger) ((All Spiller, déi am Match spillen))
Schosstraining (Buteur) (All Spiller, déi am Match spillen)
(Strofstéiss) ((All Spiller, déi am Match spillen))
Kuerzpasspill Passpill Zentral Mëttelfeldspiller, Banden a Stiermer ((All Spiller, déi am Match spillen))
Spillopbau Spillmaacher Zentral Mëttelfeldspiller (Banden) ((All Spiller, déi am Match spillen))
Goalkeepstraining Goalkeeper Goalkeeperen
Passen an d'Déift Passpill Verteideger, zentral Mëttelfeldspiller a Banden ((All Spiller, déi am Match spillen))
Defensivtraining Verteidegung (Goalkeeperen, Verteideger, zentral Mëttelfeldspiller a Banden) ((All Spiller, déi am Match spillen))
Fligelugrëff Bande Stiermer a Banden ((All Spiller, déi am Match spillen))
Individuell (Futtballschoul nëmmen) Fäegkeeten, déi fir d'Positioun vum Spiller am Match wichteg sinn. (All Spiller, déi am Match spillen)

Beispill

D'Équipe trainéiert dës Woch "Säitenugrëff". Denk dorunner, datt d'Spilldeeg anescht kënne sinn - wann hei Sonndeg steet, ass domat de Championatsmatch vum Weekend gemengt, wann hei Mëttwoch steet, ass domat de Frëndschaftsmatch oder Coupematch an der Mëtt vun der Woch gemengt.

  • De Ben Payal huet de leschte Sonndeg als 90 Minutte laang als Bande gespillt, mä de Match vum Mëttwoch huet e verpasst. E kritt fir 90 Minutten Training als Bande.
  • De Jeff Strasser huet sonndes 90 Minutten als Bande gespillt a mëttwochs 90 Minutten als Stiermer. E kritt also 90 Minutten vollen Training als Bande.
  • De Mario Mutsch huet sonndes 50 Minutten als Bande gespillt a mëttwochs 90 Minutten als Ausseverteideger. E kritt 50 Minutte vollen Training als Bande a 40 Minutten Training an der Fäegkeet mat e bësse manner Stäerkt.
  • De Fons Leweck huet am Championat 40 Minutten als Bande gespillt a mëttwochs 90 Minutten als Stiermer. E kritt 40 Minutte vollen Training als Bande a 50 Minutten Training an dëser Fäegkeet, mä nëmme ganz wéineg ("Training am Hannergronn").
  • Den Eric Hoffmann spillt sonndes a mëttwochs 90 Minutten als Ausseverteideger. Hie kritt 90 Minutten Training an der Fäegkeet Bande, mä mat e bësse manner Stäerkt.
  • De Paul Philippe huet sonndes a mëttwochs net gespillt. Hie verbessert sech also net vill a senger Fäegkeet Verteidegung.

Zerfall vun de Fäegkeeten

Wann e Spiller mam Alter un d'30 Joer erukënnt, verléiert hien all Woch e klengen Deel vu senge Fäegkeeten. Wéi grouss de Verloscht ass, hänkt vum Alter vum Spiller a vum Niveau vun der Fäegkeet of. Wat den Niveau méi héich, wat de Verloscht méi grouss ass. D'Verloschter bei ale Spiller si méi grouss wéi bei jonke Spiller.

 
 
Server 080